Հասարակություն

Մարդասիրական օգնություն՝ կարիքավոր ընտանիքներին և սիրիահայերին

satikisahakyan
Արմավիրի մարզում գործող <<Արմենիան Լայթհաուս>>  բարեգործական հիմնադրամը մարդասիրական օգնություն է ցուցաբերում կարիքավոր ընտանիքներին և սիրիահայերին: Պատերազմի պատճառով Հայաստան ներգաղթած մեր հայրենակիցների կարիքներն ավելի մեծ են:

<<Արմենիան Լայթ հաուս>>  բարեգործական հիմնադրամը  <<Հույսի ճրագ>> ծրագրի միջոցով օգնության ձեռք է մեկնել ինչպես Հայաստանում ապրող կարիքավորներին, այնպես էլ  Սիրիայից ներգաղթած մեր հայրենակիցներին:  Սիրիահայերն այստեղ ունեն իրենց ընդունելության ժամերը: Արմենիան Լայթ հաուս բարեգործական հիմնադրամի փոխտնօրեն Նելլի Մեսրոպյանը նշեց, որ կարիքավորներին տրվում է այն ամենը, ինչն անհրաժեշտ է  կենցաղում՝  հագուստ,կոշիկ,  անկողին, սպասք և այլն:

<<Հույսի ճրագ>> ծրագրի շրջանակներում  50 ընտանիքի ամեն ամիս ամերիկահայ  հովանավորների  կողմից տրվում է դրամական օգնություն:  <Արմենիան լայթհաուս>> բարեգործական հիմնադրամի գործունեությունը կազմակերպում և տնօրինում է  Սեդա Ղազարյանը. <<Ամեն բան կտրվի անվճար, իրավունք չունինք առնելու և ծախելու, ան 100 դոլարը, որ կուղարկվի հովանավորներուն կողմեն, նույնպես ամեն ամիս կփոխանցվի այդ 50 ընտանիքներին>>:

Սեդա Ղազարյանը ուրախությամբ է պատմում այն  ընտանիքների մասին, որոնք հատկացված օգնության պարագաներով կարողանում են ընտանիքի հոգսերը հոգալ:  Ասում է, եթե զարդեր եմ տրամադրել մի կարիքավոր ընտանիքի և նրանք այդ զարդերը փոխանակում են սննդի՝ ձվի, յուղի, կաթի ու մածունի հետ, ապա ես կշարունակեմ նրանց օգնել:

Մերձավոր Արևելքում դեռ վերջ չունեցող պատերազմական գործողությունները ստիպում են տեղի բնակչությանն արտագաղթել իրեն բնօրրանից: Սիրիայից մինչև օրս շարունակվում է հայերի ներգաղթը Հայաստան, որոնք մայր հայրենիք են հասնում միայն անձնական փաստաթղթերով: Նրանց կարիքներն ավելի մեծ են: Սիրիացի մի քանի կանանց Արմենիան Լայթհաուսը ժամանակավորապես հատկացրել էր նաև կացարան:

Սիրաիհայերը արևելյան խոհանոցի վարպետներ են, օրվա հացը վաստակելու և այլ կարիքներ հոգալու նպատակով շատերն են օգտագործում իրենց խոհարարական հնարքները: Արմենիան Լայթհաուսից նրանց  հատկացվեցին նաև միկրոալիքային վառարաներ:  Նազար Մելքոնյանը կնոջ հետ արդեն մեկ տարի ապրում է Երևանում, երեխաները մնացել են Հալեպում: Ապրելու միջոցներ ստեղծելու համար միկրոալիքային վառարանով սնունդ են պատրաստելու և վաճառելու.<<Դրսում իմ լահմաջոները 500 կծախեի, հոս պատվեր կվերցնեմ ու 300 կվաճառեմ>>:  Իսկ մինչ այդ  օրվա հացը վաստակել են իրենց սարքած աղացած կարմիր պղպեղ վաճառելու միջոցով:

Back to top button