Երևանում մեկնարկել է «Արմպրոդէքսպո» մասնագիտացված ցուցահանդեսը: Ցուցահանդեսին մասնակցում են հանրապետության մարզերի, Արցախի գյուղատնտեսության, գյուղատնտեսական մթերք վերամշակող արտադրության գրեթե բոլոր ճյուղերի ներկայացուցիչներ, ինչպես նաև ագրարային ոլորտը սպասարկող և ծառայություններ մատուցող շուրջ 90 կազմակերպություն:
Մարգարիտա Կիրակոսյանը Լոռու մարզից է: Ձեռքի փոքրիկ տարայով մուրաբա է՝ պատրաստված եղեւնու կոներից է: Ասում է՝ սա ոչ թե մուրաբա է, այլ՝ դեղամիջոց: Այն պատրաստվում է Լոռու մարզի Գյուլաքարաք համայնքում:
Շարժվում ենք առաջ՝ արցախյան բերքն ու բարիքն է ներկայացնում Քաշաթաղի շրջանից Դավիթ Ստեփանյանը, կամ ինչպես նրան ճանաչում են Քաշաթաղում, մեղր Դավիթը: Անարատ ու համով մեղր ստանալու գաղտնիքներին Դավիթը տիրապետում է ամբողջությամբ։ Ասում է՝ 100 տոկոսանոց մաքուր մեղր է: Մեղր Դավիթն ասում է, որ Քաշաթաղի շրջանի մեղրը, այնտեղ աճող ակացիայի ու լորենու շնորհիվ յուրահատուկ համային հատկություն ունի:
Իսկ ահա «Արմպրոդէքսպո» մասնագիտացված ցուցահանդեսի տաղավաներում տարածվել էր «Քյավառի փախլավա»- ի հոտը: Հենց այս փախլավան էլ օրեր առաջ հասել է Ստրասբուրգ ու մասնակցել այնտեղ համտեսի մրցույթին:
«Արմաս» գինու ու կոնյակի ընկերությունն էլ նրբաճաշակ քիմք ունեցողներին հրավիրում էր տաղավար: Ընկերություն վաճառքի պատասխանատու Մերի Սահակյանը «Ռադիոլուրին» հյուրասիրում է սպիտակ դառը գինի ու ասում՝ ունենք 8 տեսակի գինի։ Երկու տեսակն էլ հնեցնում
են ղարաբաղյան կաղնու փայտից պատրաստված տակառներում:
Գինու մեջ հնեցնում են նաև պանիրը: Սա նորամուծություն է հայկական շուկայում: Ընկերության համահիմնադիր Արման Միքայելյանն ասում է, որ այն յուրահատուկ համային հատկանիշներ ունի: Պանիրն արտադրվում է Գեղարքունիքի մարզի Գավառ քաղաքում:
Գրեթե բոլոր զրուցակիցներս նշում էին, որ իրենց հիմնական խնդիրն այսօր ապրանքի իրացումն է: Պետք է նոր գործիքներ կիրառել գյուղատնտեսություն զարգացման համար, առաջնայինը՝ բիզնես ներդրումները պետք է ավելանան: Սակայն այդ ներդրումները ավելացնելու համար նախևառաջ պետք է համապատասխան միջավայր ստեղծել: Գյուղատնտեսություն նախարար Իգնատի Առաքելյանն ասում է, որ պետք է այնպես անեն, որպեսզի գործարարները պատրաստ լինեն խոշոր հողատարածքներ մշակել ու զարգացնել։ Նախարարը վերջնաժամկետ է սահմանել. մինչև տարեվերջ բոլոր մարզերը պետք է գյուղատնտեսության զարգացման մեկ ծրագիր ներկայացնեն:
