Մշակույթ

Ռ. Մլքեյան. «Խնդիրն այն է, որ դրսում ներկայացնենք մեր լավագույնը»

alisagevorgyan

Միջազգային հարթակում ներկայացնել հայ  մշակույթը մեր լավագույն կոլեկտիվների միջոցով.  մշակույթի նախարարության հիմնական դերը՝ ըստ Հայաստանի պետական կամերային նվագախմբի գեղարվեստական ղեկավար եւ գլխավոր դիրիժոր Ռոբերտ Մլքեյանի: «Ռադիոլուրի» հետ զրույցում արվեստագետը խոսել է այն խնդիրների մասին, որոնք մշուշում են  հայ արվեստագետի լիարժեք ստեղծագործական կյանքը:

 

«Արվեստագետը չի կարող լիարժեքորեն տրվել իր գործին, եթե ստիպված է միաժամանակ մի քանի տեղում աշխատել: Արվեստագետի սոցիալական խնդիրն այսօր ամենացավոտն է մեր կյանքում»,- Հայաստանի պետական կամերային նվագախմբի գեղարվեստական ղեկավար եւ գլխավոր դիրիժոր Ռոբերտ Մլքեյանն այս առումով  դրական փոփոխությունների անհրաժեշտություն է տեսնում: «Հակառակ դեպքում ստացվում է այնպես, որ մենք ապրում ենք   ոչ թե ստեղծագործական , այլ խնդիրներ լուծելու կյանքով»,- ասում է արվեստագետը:

Կարևորագույն մեկ այլ խնդիր, որը ևս շեշտում է։ «Այնպիսի փոքր երկրում, ինչպիսին Հայաստանն է, ակադեմիական արվեստի բոլոր ներկայացուցիչները պետք է մեկ գերնպատակ ունենան: Եթե Ֆրանսիայի ազգային ռադիոյի եթերի 51 տոկոսը, պարտադիր պահանջի համաձայն, լցված է ֆրանսիական երաժշտությամբ, ապա այդ երկիրն իրականացնում է քաղաքականություն, և շատ ճիշտ քաղաքականություն: Ես կոչ եմ անում մեր արվեստագետներին՝ շեշտը դնել  հայկական երաժշտության վրա: Կատարել հայ կոմպոզիտորների ստեղծագործությունները»:

«Չեմ բողոքում, հայ ակադեմիական երաժշտական  կյանքն այսօր անհամեմատ լավ վիճակում է, քան խորհրդային տարիներին: Միայն մենք տարեկան 30 համերգ ենք ունենում: Քիչ չեն նաև արտասահմանյան հյուրախաղերը: Խնդիրն այն է, որ դրսում ներկայացնենք մեր լավագույնը»,- ասում է կամերային նվագախմբի ղեկավարը՝ հայ երաժշտության հանրահռչակման իր կոչն ուղղելով ակադեմիական արվեստի բոլոր կոլեկտիվներին և անհատներին:

Իսկ որն է այս ամենում մշակութային գերատեսչության դերը: «Նպաստել նրան, որպեսզի Հայաստանն արտասահմանում առավել հաճախ ներկայացնեն  մշակութային բարձրարժեք  կոլեկտիվները». Ռոբերտ Մլքեյանի տեսակետն է: Իր մտահոգություններն ու առաջարկությունները նա փոխանցել է նաև մշակույթի նախարար Արմեն Ամիրյանին: Հանդիպումից հետո լիահույս ու լավատես է. «Ես հասկացա, որ առկա է մասշտաբային մտածելակերպ: Նա անմիջապես որսում է առողջ առաջարկն ու տանում առաջ՝ սա արվելու է, վերջ, սկզբունքով: Շատ տպավորված եմ և հույս ունեմ, որ այսպես  կշարունակվի ու կդառնա մշտական գործելակերպ»:

Մշակույթի նախարարության հիմնական դերը, ըստ Ռոբերտ Մլքեյանի, միջազգային հարթակում ներկայացնել հայ  մշակույթը մեր լավագույն կոլեկտիվների միջոցով:

Back to top button