Հասարակություն

Արևային մայրաքաղաքի երկինքը զարդարվեց շքեղ հրավառությամբ

Շնորհավո՜ր տոնդ, իմ ջերմ ու բարի քաղաք

Մայրաքաղաքի ծննդյան 2798-ամյակին նվիրված տոնական միջոցառումները եզրափակվել են արևային մեր մայրաքաղաքի երկինքը զարդարող շքեղ հրավառությամբ:

Արևային քաղաքի տոնին նվիրված ֆլեշմոբեր՝ մայրաքաղաքի տարբեր հատվածներում

Երևանի 2798-րդ տարեդարձի առթիվ մայրաքաղաք տարբեր հատվածներում ժամը 14:00-ից տարբեր ժամերի տոնի մասնակից դարձած անցորդներին Երևանի քաղաքապետարանի կողմից հետաքրքիր անակնկալ է սպասել՝  ֆլեշմոբեր:

Երաժշտական, պարային կատարումներով, ասմունքով, մարզական համարներով ֆլեշմոբերն անտարբեր չեն թողել քաղաքացիներին, ովքեր միացել և ամբողջացրել են տոնական տրամադրությունը:

Ֆլեշմոբեր են կազմակերպվել նաև ազգային գործիքներով՝ դուդուկներով և պարկապզուկներով:

Մայրաքաղաքի տոնը՝ Էրեբունի ամրոցի հարևանությամբ

Մայրաքքաղաքի 2798-ամյակին նվիրված միջոցառումներն Էրեբունի փողոցում շարունակվել են նաև երեկոյան:

«Էրեբունի» պատմահնագիտական արգելոց-թանգարանի հարակից բեմահարթակում «Արևի քաղաք» խորագրով համերգային ծրագրի ընթացքում հնչել են հայկական ժողովրդական երգեր:

Շուրջ 3 ժամ շարունակվող միջոցառումն իր շուրջն է համախմբել ինչպես Էրեբունի վարչական շրջանի բնակիչներին, այնպես էլ մայրաքաղաքի տոնը նշելու համար տարբեր հատվածներից Էրեբունի շտապած բնակիչներին:

«ԷրեբունիԵրևան 2798». դասական   երաժշտությունԿոնսերվատորիայի պուրակում

Երևանի 2798-րդ տարեդարձին նվիրված միջոցառումների շարքում մայրաքաղաքի տարբեր հատվածներում տեղակայված  բեմերում ներկայացվել են համերգային տարաբնույթ ծրագրեր:

Կոմիտասի անվան պետական կոնսերվատորիայի հարակից պուրակում տեղադրված բեմահարթակն արդեն երեկոյան իր շուրջն էր համախմբել  դասական   երաժշտության   սիրահարներին՝ ունկնդրելու պրոֆեսիոնալ նվագախմբերի ու անհատների կատարումները:

Բեմում էին  հնագույն երաժշտության «Տաղարան» համույթը, Երևանի Կոմիտասի անվան պետական կոնսերվատորիայի մենակատարները և Երևանի պետական կամերային երգչախումբը:

«Հռոմից հին մայրաքաղաքը» փաստավավերագրական ֆիլմը՝  Կարապի լճի էկրանին

«Էրեբունի-Երևան 2798» տոնակատարության միջոցառումների շրջանակում Կարապի լճի տարածքում տեղադրված մեծ էկրանին ցուցադրվել է «Հռոմից հին մայրաքաղաք» փաստավավերագրական ֆիլմը: Ֆիլմում ներկայացված է Երևանի պատմությունը՝ վաղ շրջանից մինչ մեր օրերը: Հռոմից հին մայրաքաղաքի հիմնադրման մասին են խոսում նաև բազմաթիվ օտարազգի գիտնականներ: Արևմտյան Հայաստանում, Իրանում, եվրոպական և մի շարք այլ քաղաքներում կատարված նկարահանումները ամբողջացվել են մեկ ֆիլմում, որը մանրամասն նկարագրում է Արևի քաղաք Երևանի 2798-ամյա պատմությունը:

Կինոդիտող մեր համաքաղաքացիները նշել են, որ թեև մայրաքաղաքի պատմությանը լավատեղյակ լինելը յուրաքանչյուր բնակչի պարտքն է, նման ձևաչափով Երևանի պատմության ներկայացումը կարևոր է նաև մայրաքաղաք այցելող զբոսաշրջիկներին մատուցելու համար:

Ազգագրական պարերի տոնական շքերթ Ազատության հրապարակում

Ազգագրական պարերը ևս  տոնական Երևանի անբաժանելի մասնիկն են: Ազատության հրապարակի բազմաթիվ միջոցառումներից մեկն ազգագրական  պարերի տոնական շքերթն էր: «Կարին» ազգագրական երգի ու պարի համույթի անդամները գեղարվեստական ղեկավար Գագիկ Գինոսյանի գլխավորությամբ  ոչ միայն պարում էին, այլ նաև ուսուցանում հայկական լեռնաշխարհի ավանդական հայկական պարեր ու պարային շարժումներ, ներկայացնում դրանց ծագումնաբանությունը: Ազգագրական պարը համակել էր բոլորին. Ազատության հրապարակը պարում էր:

Ավանդական հեծանվավազքը` տոնական միջոցառումների շարքում
Մայրաքաղաքի տոնական միջոցառումների շարքում սպասվածներից մեկն էլ տոնական հեծանվավազքն է, որն այս տարի  մեկնարկել է Արգիշտիի փողոցից և  Իտալիայի փողոցով հասել Հանրապետության հրապարակ: Մարզիկները վերադարձել են նույն երթուղով և վերջնականգառն էլ կատարել դարձյալ Արգիշտիի փողոցում: Հեծանվորդների խումբը տոնական երթն անցկացրել է Երևանի դրոշներով:

«Արևային ջազ»՝ Կասկադում

Քաղաքամայր Երևանի 2798-րդ տարեդարձի առթիվ Երևանի քաղաքապետարանը, «Հայկական ջազի ասոցիացիայի» հետ համատեղ հաճելի անակնկալ է մատուցել ջազի սիրահարներին: «Կասկադ» համալիրի տարածքում ջազի բեմահարթակում «Արևային ջազ» խորագրով hամերգային ծրագրի շրջանակում ելույթ են ունեցել հայկական ջազի անհատ կատարողներն ու ջազային նվագախմբերը՝ այդ թվում Երվանդ Երզնկյանը, Արմեն Թութունջյանը(Չիկո), ովքեր ներկայացրել են հայ և արտասահմանցի ջազմենների սիրված կատարումներ:

Տիկնիկների շքահանդես՝  Արևի քաղաքում

«Երևան՝ արևի քաղաք» կարգախոսով վաղ առավոտից մեկնարկած «Էրեբունի-Երևան 2798» տոնակատարության շրջանակում մանուկների համար ևս  կազմակերպվել են բազմաբնույթ միջոցառումներ, որոնց շարքն այս տարի համալրվել է նորամուծությամբ՝ տիկնիկների շքահանդեսով: Շքահանդեսի մեկնարկել է Հովհաննես Թումանյանի տուն-թանգարանից, որտեղից թումանյանական մանկական ստեղծագործությունների հայտնի հերոսները  քայլերթով  շարժվել են դեպի Հովհ. Թումանյանի անվան տիկնիկային թատրոն՝ ճանապարհին ողջունելով և շնորհավորելով  փոքրիկ երևանցիներին և անցորդներին: Շքահանդեսն անցել է նաև Սայաթ-Նովա, Աբովյան փողոցներով՝ մինչև Հանրապետության հրապարակ, որտեղ փոքրիկներին սպասում էր ևս մեկ անակնկալ: Այս անգամ տոնական մթնոլորտն ու բարձր տրամադրությունը թումանյանական հերոսները տեղափոխել էին  Մետրոյի «Հանրապետության հրապարակ» կայարան, որտեղ քիչ անց նրանց   միացել են նաև  Կոմիտասի անվան պետական կոնսերվատորիայի ուսանողները՝ գործիքային կատարումներով և կազմակերպած անակնկալ ֆլեշ մոբով: Շնորհավորելով Երևանի տոնը և իրենց գոհունակությունը հայտնելով նմանատիպ նախաձեռնության համար՝  ծնողները կարևորել են երեխաների համար նմանօրինակ միջոցառումների անցկացումն ու շնորհակալություն հայտնել քաղաքապետարանին՝ բազմաբովանդակ ու հագեցած միջոցառումների ծրագրի համար:

Երևանի քաղաքապետարանի տեղեկատվության և հասարակայնության հետ կապերի վարչություն

Back to top button