Հասարակություն

Ավագ դպրոցի բեռնաթափումը դրական են գնահատում նաեւ Արմավիրում

satikisahakyan

Սեպտեմբերի 1-ին  ընդառաջ այսօր Արմավիրի մարզի դպրոցների տնօրենների հետ խորհրդակցություն է անցկացրել կրթության և գիտության նախարարության հանրակրթության վարչության պետ Նարինե Հովհաննիսյանը: Նոր ուսումնական տարում որոշակի փոփոխություններ են իրականացվելու  հանրակրթության ոլորտում, բեռնաթափվելու են ավարտական դասարանների առարկանները, փոխվելու է քննությունների անցկացման կարգը։

Արմավիրի մարզում կրթության քաղաքականությունն իրականացվում է սահմանված պահանջներին համապատասխան:  Արմավիրի մարզպետարանի կրթության, մշակույթի և սպորտի վարչության պետ Գայանե Սայադյանը  ներկայացրեց այն հաջողություններն ու ձեռքբերումները, որոնք ունեցել են նախորդ ուստարում. կազմակերպվել և անցկացվել  են առարկայական օլիմպիադաներ, տարվա լավագույն ուսուցիչ, տնօրեն, դպրոց մրցույթներ։

Կրթության և գիտության նախարարությունը մշակել և իրականացնում է նոր քաղաքականություն՝ կարևորել պետական ազգային կրթակարգ ունենալու խնդիրը: Առաջարկվել է կրթակարգի  նախագիծն ակտիվ քննարկել ուսուցչական կոլեկտիվներում՝ ներգրավելով ծնողներին և ներկայացնել համապատասխան առաջարկություններ։

Կրթության չափորոշիչների համաձայն՝ դպրոցներում սպասվում են բեռնաթափումներ: Առարկաները լինելու են մատչելի, իսկ մի քանի առարկաների ուսուցումը կկազմակերպվի խմբակներում: Քննարկվեցին նախնական զինվորական պատրաստվածության առարկայի անցկացման կարգը:

Ըստ էության դպրոցն աշխատանքի մեջ է լինելու առավոտյան  ժամը 9-ից մինչև  18-ը: Ավագ դպրոցներում հոսքային դասարաններում կանցկացվի 3 առարկայի պարապմունք՝ ըստ սովորողի նախասիրության։ Նա կմասնակցի միասնական քննություններին, դեկտեմբերին կհանձնի մյուս առարկաների քննությունները:

Խորհրդակցությունում քննարկվեցին նաև հավաստագրերի հատկացման, ուսուցիչների մրցույթի անցկացման կարգի,  դպրոցներում համընդհանուր ներառման մասին հարցերը: Վերջինս իրականացվել է Սյունիքի մարզում, սկսվել՝ Լոռիում:

Արմավիրի մարզի Մայիսյան գյուղի միջնակարգ դպրոցի տնօրեն  Իշխան Պետրոսյանը կարծիք հայտնեց կատարվող փոփոխությունների մասին. «Վաղուց պետք է արվեր դա, քանի որ 12-րդ դասարանցին, հատկապես ավագ դպրոցներում սովորող աշակերտները, ստիպված են միասնական քննությունների հետ հանձնել մյուս առարկաների քննությունները, իսկ հիմա դրանից ազատվելու է նախապես»:

Պետրոսյանը ուրախությամբ նշեց դպրոցների տնօրեններին հավաստագրեր հանձնելու կարգի փոփոխության մասին, որը ժամանակ էր խլում։ Միաժամանակ՝ առաջարկեց բարձրացնել ուսուցիչների աշխատավարձը, քանի որ հիմա դպրոցներում  մասնագետ ուսուցիչների պակաս է զգացվում և բուհ ավարտած լավագույն մասնագետը չի գալիս դպրոցում դասավանդելու:

Back to top button