Հայաստանի և Իրանի միջև մուտքի արտոնագրերի վերացման մասին հուշագիրն արդեն ուժի մեջ է մտել, և երկու պետությունների քաղաքացիները կարող են առանց վիզայի մինչև 3 ամիս ժամկետով այցելել հարևան պետություն: ՀՀ-ում Իրանի արտակարգ և լիազոր դեսպան Սեյեդ Քազեմ Սաջադի կարծիքով՝ մուտքի վիզաների վերացումը նոր խթան կհանդիսանա տնտեսական կապերի զարգացման համար, իսկ Իրանը Հայաստանը կարող է օգտագործել՝ Եվրասիական տնտեսական տարածք մուտք գործելու համար:
Իրանի Իսլամական Հանրապետության խորհրդարանի հայ պատգամավոր Ժորժ Աբրահամյանը «Ռադիոլուրի» հետ զրույցում նշում է, որ Իսլամական Հանրապետության խորհրդարանում նրանք ունեն բոլոր այն իրավունքները ինչպես մնացյալ 230 պատվիրակները; Նշենք, որ Իրանի խորհրդարանում երկու հայ պատգամավոր կա։ Մեր զրուցակից ժորժ Աբրահամյանը խորհրդարանում ներկայացնում է Հյուսիսային Իրանում բնակվող հայերի շահերը։ Ասում է ,որ իրեն հաջողվել է մի քանի կարևորագույն օրինագծերում փոփոխություններ կատարել՝ քրիստոնյաների իրավունքների հետ կապված: «Իսլամական համակարգի մեջ կա «դիե» հասկացողություն։ Այսիքն՝ եթե պատահում է սպանություն, դա լինի վթարի ու այլ պատճառներով, ապա սպանվածի ու մահացածի հարազատները կարող են արյան գին պահանջել: Ըստ իսլամական օրենքների՝ քրիստոնյաների արյան դիմաց ավելի քիչ էին վճարում, իսկ հիմա խորհրդարանը լուծում տվեց ու արյան գինը հավասարվեց»,- ասում է։
Ժորժ Աբրահամյանը շեշտում է, որ իրենց ներկայությունը Իրանի խորհրդարանում հնարավորություն է տալիս Հայաստան- Իրան հարաբերությունները՝ հատկապես տնտեսական զարգացնել: Ըստ Ժորժ Աբրահամյանի՝ հայ- իրանական քաղաքական հարաբերությունները ավելի բարձր մակարդակի վրա են գտնվում, քան՝ տնտեսական: Խորհրդարանի պատգամավորի հետ համաձայն է նաև ՀՀ-ում Իրանի արտակարգ և լիազոր դեսպան Սեյեդ Քազեմ Սաջադին։ Վերջինս նշում է, որ Հայաստանի և Իրանի միջև մուտքի արտոնագրերի վերացումը նոր խթան կհանդիսանա տնտեսական կապերի զարգացման համար, իսկ Իրանը Հայաստանը կարող է օգտագործել՝ Եվրասիական տնտեսական տարածք մուտք գործելու համար:Հիշեցենք, որ հուշագիրն արդեն ուժի մեջ է մտել, և երկու պետությունների քաղաքացիները կարող են առանց վիզայի մինչև 3 ամիս ժամկետով այցելել հարևան պետություն:
«Ռադիոլուրի» դիտարկմանը, որ այսօր Հայաստանում շատ իրանցիներ բիզնես գործունեություն են զարգացնում, արդյո՞ք հայերը նույնպես կարող են բիզնես զարգացնել Իրանում, դեսպանը նշեց. «Պետք է ասեմ, որ երկու երկրներն ունեն դարավոր բարեկամություն և դարեր ի վեր միշտ կողք կողքի են եղել և, նկատի ունենալով, որ Հայաստանն արդեն անդամակցում է ԵԱՏՄ-ին, այս ուղղությամբ էլ գործունեությունը զարգացնելու շատ լավ հեռանկարներ կան երկու երկրների գործարարների համար»:
Դեսպանն անդրադառնում է նաև հայ- իրանական էներգետիկ համագործակցությանը: Հիշեցնենք, որ Սյունիքի մարզում ընթանում են Իրան-Հայաստան բարձրավոլտ երրորդ գծի «Նորավան» ենթակայանի շինարարական աշխատանքները: Արդեն մեկնարկել են հողային աշխատանքները։ 100 մգ վատ հզորությամբ գծով հնարավոր կլինի էլեկտրաէներգիա մատակարարել Հայաստանից Իրան եւ հակառակ ուղղությամբ: Ինչպես ենթակայանի, այնպես էլ օդային գծի կառուցումը նախատեսվում է ավարտել մինչև 2018թ վերջ: Դեսպանը նշում է, որ այս առումով հարաբերություններն օր- օրի զարգանում են: «Գազ՝ էլեկտրաէներգիայի դիմաց բարտերային պայմաններում միշտ էլ երկու երկրները միմյանց աջակցել ու համագործակցել են, և դժվար պահին, երբ Հայաստանը գազի խնդիր ուներ Վրաստանի ուղղությամբ, Իրանը կարողացավ գազ ապահովել Հայաստան»:
Դեսպանից հետաքրքրվեցինք նաև վերջերս ակտիվություն ցուցաբերվող Ռուսաստան-Ադրբեջան-Իրան համագործակցությունից ու այդ համատեքստում նկատեցինք, որ Հայաստանի ուղղությամբ, կարծես, պասիվություն կա: Դեսպանը նշեց, որ Իրանը միշտ պահպանել է հարևանների հետ հարաբերությունները և քաղաքական առումով որևէ սահմանափակում չունի Հայաստանի հետ համագործակցությունը զարգացնելու ուղղությամբ: «Այսօր Իրանում հայերն ու պարսիկներն ապրում են խաղաղ համակեցության մեջ և որևէ խնդիր չի եղել»,- եզրափակեց դեսպանը:
