Վերլուծական

Կնեսետում մեծանում է Հայոց ցեղասպանության նկատմամբ ուշադրությունը՝ ասում է ԱԺ պատգամավորը

annanazaryan

Արդեն երեք տասնյակի հասնող պետություն ու միջազգային կառույց է ճանաչել Հայոց ցեղասպանությունն ու աստիճանաբար դատապարտողների թիվը մեծանում է: Կնեսետում քննարկման ներկայացված հարցը ևս մեկ քար էր ճանաչման ճանապարհին քանի որ այս անգամ շատացել էին բանաձևի կողմնակիցները:

 

Իսրայելի խորհրդարանում Հայոց ցեղասպանությունը ճանաչող ու դատապարտող բանաձևը 1 ժամ տևած քննարկումից հետո դարձյալ չդրվեց քվեարկության  ու հետ ուղարկվեց կրթության հանձնաժողով` լրացուցիչ քննարկման համար։ Սակայն բանաձևը քվեարկության դնելու կողմնակիցների թիվը, ի տարբերություն մինչ այս կազմակերպված քննարկումների, ավելի մեծ էր:

Պետք է նկատել, որ Կնեսետի՝ քվեարկությունը հետաձգելու որոշումը հարուցեց դահլիճում ներկա հայ համայնքի ներկայացուցիչների, ինչպես նաեւ հրեա ականավոր գիտնականների հիասթափությունն ու զայրույթը։ Ելույթ ունեցող տարբեր կուսակցություններ ներկայացնող բոլոր պատգամավորները շեշտում էին, որ 1915-ին տեղի ունեցածը Ցեղասպանություն է, բերում էին բազում փաստարկներ այդ ձեւակերպման օգտին։ Սակայն կառավարության ներկայացուցչի ամփոփիչ ելույթից հետո որոշում կայացվեց  հետաձգել քվեարկությունը։ Ինչո՞վ է պայմանավորված այս կեցվածքը:

ՀՅԴ Հայ դատի ու քաղաքական հարցերի հանձնաժողովի պատասխանատու Կիրո Մանոյանի կարծիքով՝ նման քայլը Թուրքիայի հետ առանց այն էլ դժվար կարգավորվող հարաբերությունները չփչացնելու նպատակ ուներ։

Այդուհանդերձ այս բանաձևը լրացուցիչ լծակ է Իսրայելի ձեռքին Թուրքիայի հետ բարդ հարաբերություններում ցույց տալու Անկարային իր տեղը՝ կարծում է Մանոյանը:

Այսօր իհարկե իր շահերից ելնելով Թուրքիան առավել ճկունություն  է դրսևորում, մեկուսացումից դուրս գալու ջանքեր է գործադրում և դա էր թերևս Էրդողանի ներողության ու Իսրայելի հետ հարաբերությունները բարելավելու շարժառիթը:

Պաշտոնական Թել Ավիվին էլ ձեռնտու է Անկարայի հետ հարաբերությունները բարելավել։ Բնական գազի պաշարները, որոնք հայտնաբերվել են Միջերկրական ծովում՝ Իսրայելի տարածքային ջրերում են։ Սակայն այն Եվրոպա հասցնելու ամենահեշտ ու էժան ճանապարհն անցնում է Թուրքիայով։

Իսրայելի կողմից Հայոց ցեղասպանության ճանաչման համար հիմքեր չի տեսնում ԱԺ պատգամավոր Թևան Պողոսյանը։ Հարցը մի քանի անգամ հայտնվել է Կնեսետի օրակարգում։ Հարցի նկատմամբ ուշադրությունն է մեծացել՝ ասում է Թեւան Պողոսյանը։ Նա համոզված է, որ աստիճանաբար կմեծանա Հայոց ցեղասպանության կողմնակից պատգամավորների թիվը, ինչը կհանգեցնի համապատասխան բանաձեւի ընդունման։

Ցեղասպանության 100-րդ տարելիցը կարծես սահմանագիծ լիներ 20-րդ դարասկզբի ոճիրի դատապարտման եւ ճանաչման համար:  Մեկ դարը ոչ միայն մոռացության չմատնեց, այլ նաև նոր՝ ավելի լայն ճանապարհ հարթեց ողջ աշխարհում այդ չարիքն արմատախիլ անելու գործում առաջընթաց գրանցելու համար: 2015-ին Հռոմի պապի խոսքերը ուղերձ էին կարծես ողջ աշխարհին՝ հետևելու Պապի օրինակին:

Գերմանիայի Բունդեսթագը ճանաչեց այն, խոսվում է Մեծ Բրիտանիայի  Լորդերի պալատում հարցի քննարկման մասին, քաղաքական գործիչների կողմից կարծիքներ են հնչում, որ Օբաման իր պաշտոնավարման ավարտին կարտասանի «ցեղասպանություն» բառը:

Back to top button