Լուսինե Ավանեսյան
«Ռադիոլուր»- Ստեփանակերտ
«Ճիշտ ժամանակն է, որ Արցախի Հանրապետությունը բանակցային սեղանի շուրջ որպես անկախ պետություն ներկայացնի իր շահերը»,- կարծում է Հայաստանի Հանրապետությունում ԱՄՆ նախկին դեսպան Ջոն Էվանսը, որը Լեռնային Ղարաբաղի Հանրապետություն է այցելել «Հայաստանի մանուկներ» հիմնադրամի պատվիրակության կազմում: Պատվիրակությունը հանդիպել է ԼՂՀ նախագահի, վարչապետի հետ:
«Անձամբ ես այն կարծիքին եմ, որ ճիշտ ժամանակն է, որ Լեռնային Ղարաբաղն արդեն բանակցային սեղանին շուրջ նստի` որպես անկախ պետություն։ Այսինքն ինքը ներկայացնի իր շահերը: Չէ՞ որ երբ 1994 թվականին ստորագրվել է զինադադարի մասին համաձայնագիրը, Արցախը եւս այն ստորագրել է, եւ կարծում եմ, որ Արցախը բանակցային գործընթացին եւս պետք է մասնակցություն ունենա»,-թերեւս սա Միացյալ Նահանգների նախկին դեսպանի Ստեփանակերտում արած միակ քաղաքական հայտարարությունն էր:
Ղարաբաղյան հակամարտության կարգավորման բանակցային գործընթացի մասին հարցին ի պատասխան՝ էվանսն ասաց, որ ինքն ուղղակի մասնակցություն չունի դրան, հետեւում է ինչպես ԱՄՆ դեսպան Ուորլիքի, այնպես էլ մյուս համանաշագահների գործունեությանը։ Առանձնացրեց Ռուսաստանի արտգործնախարար Սերգեյ Լավրովին` ասելով, թե նա միշտ շեշտում է, որ հիմնախնդիրը պետք է լուծվի խաղաղ ճանապարհով:
Լրագրողների հետ շփումներում Ջոն Էվանսը ընդգծեց, որ Արցախում է «Հայաստանի մանուկներ» հիմնադրամի աշխատանքերի բերումով եւ հիմնադրամի ղեկավար Կարո Արմենի հրավերով: Նախկին դեսպանը հիմնադրամի խորհրդատուն է:
«Հատկապես ապրիլյան իրադարձությունները ցանկություն առաջաջացրեցին, որ գամ եւ դոկտոր Գարո Արմենի հետ փորձենք հասկանալ, թե ինչպես հիմնադրամի ծրագրերը բերենք Արցախ եւ փորձենք իրագործել այստեղ»,- ասաց Էվանսը։
Իհարկե, Հայաստանում ԱՄՆ նախկին դեսպանի համար ադրբեջանական սեւ ցուցակի գոյությունը գաղտնիք չէ, որ ինքը եւս կարող է լրացնել այդ ցուցակը, ենթադրելի էր:Արձագանքելով դիտարկմանը, թե իր արցախյան այցն այնուամենայնիվ քաղաքական տեսանկյունից է մեկնաբանվելու, դեռեւս պաշտոնավարման ժամանակ իրերն իրենց անունով կոչելու բնավորություն ունեցող դեսպանը, ում պաշտոնաթողության պատճառը հայտարարությունն էր, թե 1915թ. իրադարձությունները «ցեղասպանություն» են, ասաց, որ ինքը հայերի հետ կապերը պաշտոնաթողությունից հետո չի խզել: Վերջերս Ջոն Էվանսի «Պատանդված ճշմարտություն» գիրքն է հրատարակվել, որը նվիրված է Հայոց ցեղասպանությանը:
«Գարո Արմենի հետ մենք պատրաստ ենք օգնել Արցախի ժողովրդին, քանի որ Արցախի ժողովուրդը ողջ հայ ժողովուրդի հետ արդեն հարյուրամյակ է, ինչ անցնում է դժվարությունների միջով: Գիտենք որքան ողբերգություններ են եղել:Վերջին իրադարձությունները կոփել են ժողովրդին, բայց մենք վստահ ենք, որ միասին կարող ենք ավելի լավ արդյունքերի հասնել։ Շեշտեմ ՝խոսքը հումանիտար շրջանակներում իրականացվելիք ծրագրերի մասին է»:
Ջոն Էվանսը երեկ եւ այսօր որպես «Հայաստանի մանուկներ» հիմանդրամի խորհրդատու հնարավորություն կունենա ավելի մոտիկից ծանոթանալ Լեռնային Ղարաբաղի հետ: Պատվիրակությունը լինելու է Արցախի շրջաններում, նաեւ այն վայրերում, որոնք տուժել են վերջին ռազմական գործողություններից, հանդիպելու են տարհանվածների հետ:
