Վերլուծական

Լայնամասշտաբ պատերազմ միջազգային հանրությունը թույլ չի տա

lenabadeyan

Ղարաբաղյան հակամարտության կարգավորման ուղղությամբ այս պահին սկսված գործընթացները թեեւ տանում են դեպի բանակցությունների վերսկսում, բայց այդ հանդիպումների վերլուծություններում քաղաքական գործիչները դեռեւս չեն բացառում ապրիլյան ռազմական գործողությունների վերսկսման հավանականությունը: Դա, սակայն, դեպքերի զարգացման տարբերակներից մեկն է: Շատերն այս պահին կարծում են, որ սանկտպետերբուրգյան հանդիպումների արդյունքն առաջին հերթին ձեռնտու է Հայաստանին: Հայկական դիրքերի ամրապնդման մասին է վկայում նաեւ Մերձավոր Արեւելքի ինստիտուտի նախագահ Եվգենի Սատանովսկու վերջին հարցազրույցը:

 

ԵԱՀԿ ՄԽ շրջանակներում հանդիպումներ կազմակերպելու նախաձեռնության զիջումը Ռուսաստանին նշանակում է, որ Արեւմուտքի համար այս պահին ընդունելի են Ռուսաստանի շահերը մեր տարածաշրջանում: «Ռադիոլուր»-ի հարցին պատասխանելով՝   քաղտեխնոլոգ Կարեն Քոչարյանը նշում է, որ պայմանավորվածություններ ձեռք են բերվել ոչ թե հակամարտող կողմերի, այլ՝ միջնորդների միջեւ:

Այս պահին սանկտպետերբուրգյան հանդիպման տեսանելի արդյունքը՝ ժամանակ շահելն է: Այլ կերպ ասած՝ հայկական կողմի համար ձեռնտու ստատուս-քվոն պահպանվում է մինչեւ հաջորդ քայլերը՝ բանակցություններից առաջ հետաքննության մեխանիզմի հիմնումն ու վստահության ձեւավորումը:

Այս ընթացքում Հայաստանը պետք է դասեր քաղի եւ պատրաստվի: «Պատրաստվել թե դիվանագիտական, թե ռազմական առումով»,- որոշ ժամանակ անց ապրիլյան դեպքերի կրկնությունը չի բացառում պատգամավոր Թեւան Պողոսյանը: Կարծում է, որ այս պահին հակամարտող կողմերից ավելի ուժեղ ճնշումների տակ է Ադրբեջանի նախագահ Իլհամ Ալիեւը:

Լայնամասշտաբ պատերազմի հավանականությունը բացառում է քաղտեխնոլոգ Կարեն Քոչարյանը: Ասում է, նախ՝ միջազգային հանրությունը դա թույլ չի տա, քանի որ այս պահին առաջին հերթին իրենց ձեռնտու չէ: Ըստ նրա՝ իրավիճակի ավելի ճիշտ պատկերացում վերջին շրջանում տվել է ամենահայտնի ռուս արեւելագետներից մեկը՝ Մերձավոր Արեւելքի ինստիտուտի նախագահ Եվգենի Սատանովսկին: Ղարաբաղ այցելելուց հետո նա ադրբեջանական կայքերից մեկին հարցազրույց է տվել, որը, ըստ Կարեն Քոչարյանի, պետք է հասկանալ հետեւյալ կերպ:  «Բաց ասում է, որ Ադրբեջանը պետք է հաշտվի այն մտքի հետ, որ երբեւէ Ղարաբաղը էլ չի լինելու իր կազմում, որ Ղարաբաղը բանակցությունների կողմ է եւ այլն, եւ այլն»:

Այս պահին սկսած գործընթացը, սակայն, երկարատեւ է: Կարեն Քոչարյանի կանխատեսմամբ՝ կարող է տեւել մի քանի տարի: Նմանատիպ կանխատեսում ունի նաեւ պատգամավոր Թեւան Պողոսյանը: Պնդում է, որ պետք չէ լուրջ ընդունել ադրբեջանական քարոզչության տարատեսակ հայտարարությունները՝ ձեռք բերված պայմանավորվածությունների մասին: Այս առումով խորհուրդ է տալիս, որ մենք ձեւավորենք քննարկումների օրակարգը եւ չլինենք Ադրբեջանի քարոզչությանը պատասխանողների դերում: Ինչ վերաբերում է փաստին, որ Սանկտ Պետերբուրգից վերադառնալուց անմիջապես հետո Հայաստանի նախագահ Սերժ Սարգսյանը մեկնեց Արցախ, պատգամավորը որեւէ թաքնված վտանգներ այդտեղ չի տեսնում: Ավելին՝ կարծում է, որ դա Արցախի կարծիքը լսելու ապացույցն է:

Back to top button