Վարչապետի որոշմամբ ստեղծված աշխատանքային խումբն ուսումնասիրել է ապրիլի մեկից հինգն ընկած ժամականահատվածում ԼՂՀ և ադրբբեջնական զորքերի շփման գծում զոհված 64 զինծառայողների ընտանիքների սոցիալական վիճակը: Ընտանիքները բնակվում են ինչպես Երևանում, այնպես էլ մարզերում: Աշխատանքի և սոցիալականհարցերի նախարար Արտեմ Ասատրյանն այսօր որոշ մանրամասներ է ներկայացրել կառավարության նիստի սկզբում: Նախարարի տեղեկացմամբ, 64 զինծառայողների ընտանիքներից տասն ունեն անչափահաս երեխաներ, 15-ը՝ ուսանողներ, զոհված զինծառայողների ընտանիքների անդամները ունեն առողջական խնդիրներ, բժշկական հետազոտության կարիք, որոշներն ունեն վիրահատության կարիք, չաշխատող անդամները ցանկություն են հայտնել հնարավորության դեպքում ընդգրկվել գյուղատնտեսական աշխատանքներում:
«Ընտանիքների մի մասն ունեն վարկային պարտավորություններ, որոշ ընտանիքներ նաև կոմունալ վճարումների դիմաց պարտավորություններ ունեն»:
Այս ընթացքում շատերն են ցանկանում օգնել զոհված զինծառայողների ընտանիքներին, առավել համակարգային աշխատելու նպատակով Արտեմ Ասատրյանն առաջարկել է աշխատանքներում ընդգրկել սոցիալական աշխատողներին:
Անդրադառնալով զոհված կամավորների ընտանիքների համար նախատեսվող աջակցության խնդրին, սոցապնախարարը հայտարարել է, որ համապատասխան որոշման նախագիծ են նախապատրաստում: Նախնական կարիքների ուսումնասիրություն են կատարել նաև վիրավոր զինծառայողների ընտանիքներում, աշխատանքային խումբի այցելել է յոթ հիվանդանոց:
Ասատրյանը վստահեցրել է, որ նրանք բոլորն էլ ստանում են բարձրակարգ ծառայություններ, խոստացել է հետագա սոցիալական ծառայությունները պատշաճ կատարելու նպատակով իրենց ուշադրության կենտրոնում պահել նաև նրանց: Վարչապետ Հովիկ Աբրահամյանի տեղեկացմամբ, այս ուսումնասիրությունների արդյուքնում մի շարք հանձնարարականներ են նախապատրաստվել, որոնք կուղարկվեն համապատասխան գերատեսչություններին:
