Վրաստանի խորհրդարնի հայազգի պատգամավոր Սամվել Պետրոսյանը երկրի կառավարությանը կոչ է արել ճանաչել և դատապարտել Հայոց Ցեղասպանության փաստը:
Նա նշել է, որ Օսմանյան կայսրությունում 100 տարի առաջ տեղի ունեցածը մեծ ողբերգություն է հայ ժողովրդի համար:
«Հայոց Ցեղասպանությունը ճանաչել են բազմաթիվ երկրներ ու միջազգային կազմակերպություններ: Մենք որպես ժողովրդավարական երկիր, պետք է ճանաչենք այդ փաստը: Գոնե հենց նրա համար, որ Օսմանյան կայսրությունը օկուպացրել է նաև վրացական հողերը: Վստահ եմ, որ եթե ժամանակին Հայոց Ցեղասպանությունը դատապարտվեր, աշխարհի տարբեր անկյուններում չէին լինի նմանատիպ ողբերգություններ: Ուզում եմ կոչ անել բոլորին` դատապարտել այս ցեղասպանությունը, այդպիսով վերականգնել պատմական արդարությունը», -Ս. Պետրոսյանի խոսքերն է մեջբերում «Грузия Online»-ը:
Նույն աղբյուրի փոխանցմամբ, հայտարարությանն արձագանքել է իշխող «Վրացական երազանք» կոալիցիայի անդամ Զվիադ Կվաճանտիրաձեն.
«Բոլորովին վերջերս կրկին փորձ եղավ Կովկասում վերսկսել մեծ, խորքային ու սառած հակամարտությունը: Բարեբախտաբար միջազգային ջանքերի շնորհիվ այս պահին հակամարտության պոռթկման վտանգ չկա, սակայն մենք պետք է միշտ հիշենք, որ մեզ շրջապատում են ուժեր, որոնք հետաքրքրված են Կովկասում մշտապես պատերազմի առկայությամբ ու դրանում Հարավային Կովկասի բոլոր երկրների ներգրավվածությամբ: Ես բոլորին կոչ եմ անում չտրվել սադրանքներին, որոնք կարող են գալ ոչ բարի ցանկություններ ունեցող հարևանից»,-հայտարարել է Կվաճանտիրաձեն:
Հիշեցնենք, որ Վրաստանի խորհրդարանում Մեծ Եղեռնի հարցն առաջին անգամ չի բարձրացվում: Սակայն ամեն անգամ այն դառնում է թեժ քննարկումների առարկա: Անցյալ տարի Ախալքալաքից մեծամասնական կարգով ընտրված պատգամավոր Սամվել Պետրոսյանի հայտարությունը ընդհատել էր ընդդիմադիր` «Միացյալ ազգային շարժում» կուսակցության, Մառնելուից ընտրված ազգությամբ ադրբեջանցի պատգամավոր Ազեր Սուլեյմանովը:
Իսկ 2012 թ. Սուլեյմանը ծեծկռտուք էր սկսել այն բանից հետո, երբ վրացի պատգամավոր Ջոնդի Բագատուրիան գործընկերներին կոչ էր արել ճանաչել Հայոց Ցեղասպանությունը: Նա այդ քայլի համար նույնիսկ իր վրացի գործընկերոջը խորհուրդ էր տվել փոխել ազգանունը` դարձնելով Բագատուրյան:
