Ընտրական օրենսգրքի նախագիծը Ազգային ժողովի հաջորդ ՝ ապրիլի 4-ին մեկնարկող քառօրյայի ընթացքում ամենայն հավանականությամբ չի քննարկվի: Օրենսդրական փաթեթն օրակարգ ներառելու հարցն այսօր պետաիրավական հարցերի մշտական հանձնաժողովի նիստում չի քննարկվել: Պատգամավորներն ու կառավարության ներկայացուցիչները չեն բացառում, որ ընտրական փաթեթի քննարկման համար արտահերթ նիստ կհրավիրվի:
Նպատակը ոչ թե նախագիծը հապճեպ ներկայացնելն է, այլ դրանում հնարավորինս շատ առաջարկները ներառելը՝ լրագրողների հետ զրույցի ժամանակ ուշացումն այսպես է բացատրել արդարադատության նախարար Արփինե Հովհաննիսյանը:
«Քննարկումնրեը դեռ շարունակվում են: Գիտեք 4+4+4 ֆորմատով քննարկումներ են գնում, դրան զուգահեռ քննարկումներ են ունենում նաև այլ ուժերոի ու դերակատարների հետ: Ուզում ենք հնարավորինս շատ առաջարկներ քննարկել ու ներառել նախագծում»:
Նախարարն այսօր տեղեկացրել է նաև, որ ստորագրված ցուցակների հրապարակման վերաբերյալ Վենետիկի հանձնաժողովն օրերս վերահաստատել է իր դիրքորոշումը: Հարցին օրերս անդրադարձել է հանձնաժողովի «Հանուն ժողովրդավար ընտրությունների» խորհուրդը և պնդել, որ ստորագրված ընտրացուցակները պաշտոնական հրապարակման ենթակա չեն:
«Միևնույն ժամանակ, Վենետիկի հանձնաժողովն ընդգծել է, որ որոշակի հանգամանքների դեպքում ընտրություններին մասնակցած կուսակցությունները պետք է հնարավորություն ունենան ծանոթանալ ընտրողների ցուցակներին, դրանք պետք է հասանելի լինեն»:
