Այսօր Հովհաննես Թումանյանի ծննդյան 147-րդ տարեդարձն է: 2008 թվականից Հայաստանում այս օրը նշվում է նաև գիրք նվիրելու օր: Օգտագործելով օրվա առիթը` հայ հրատարակիչներն այսօր խոսել են ժամանակակից ընթերցողների ոււ նրանց նախընտրած գրականության մասին։
Լավագույն նվերը գիրքն է: Այսպիսի մտածողությամբ ենք մենք՝ հայերս, կարևորում գրքի արժեքն ու նշանակությունը, իսկ այս պարագայում ասել, որ մենք թեև այս ժամանակներում գիրք չենք կարդում, սխալ է, ասում է Գիրք տարածողների ազգային ասոցիացիայի նախագահ Խաչիկ Վարդանյանը, հայերիս արժեհամակարգում գիրքը միշտ էլ մեծ դեր է ունեցել և հին ժամանակներից էլ այն մեզ համար եղել է պաշտամունքի առարկա: Սրա վկայությունն էլ փետրվարի 19-ը գիրք նվիրելու օր հայտարարելն է։ Արդեն կարծես ավանդյթ է դառնում այս օրը մեկմեկու գիրք նվիրելը։
Գրահրատարակչական ոլորտում ինտերնետը սկզբում խառնաշփոթ էր առաջացրել: Թվում էր՝ ինտերնետի առկայության պարագայում կորում է գրքի դերն ու նշանակությունը, սակայն ժամանակը ցույց տվեց, որ այս երկու ճանապարհներն առանձնանում են՝ ինտերնետը դառնում է տեղեկատվական աղբյուր, իսկ գիրքն էլ՝ գեղարվեստական զարգացվածությունն է ապահովում, ասում է «Հայաստան» հրատարակչության տնօրեն Վահագն Սարգսյանը:
Այն դիտարկումը, թե այսօր քիչ են կարդում, Ավետիք Իսահակյանի անվան կենտրոնական գրադարանի փոխտնօրեն Կարինե Մեհրաբյանը հերքում է փաստերով՝ իրենք ամեն օր 1200 ընթերցող են ունենում:
«Նոյյան տապան» հրատարակչության տնօրեն Տիգրան Հարությունյանի կարծիքով էլ խնդիրը ոչ թե լավ ստեղծագործության, այլ ընթերցանության մշակույթը չհասկանալու մեջ է: Մեր պատգամավորներն ամբողջ օրը կարդում են, սակայն անհասկանալի է, թե ինչ են նրանք կարդում, քանի որ արդյունքում ոչինչ չի փոխվում, ասում է:
