Վրաստանի Մշակույթի և Հուշարձանների Պահպանության նախարարությունում ներկայացվել է «Մենք մերոնց մոտ» ֆիլմը, որը պատմում է Հայաստանում ապրող վրացիների մասին: «Հակառակ տարածված այն կարծրատիպին, որ Հայաստանում այլ ազգերի ներկայացուցիչներ չեն ապրում, մենք ապացուցեցինք, որ Հայաստանում կան վրացիներ, նրանք ունեն իրենց կազմակերպությունները, ունեն թերթ, սեփական բիզնես և այլն, որ վրացական մշակույթը բավականին տարածված է Հայաստանում: Ես կարծում եմ, որ սա առաջին քայլն է այս ուղղությամբ. քանի որ սա քիչ ուսումնասիրված թեմա է, ապագայում մենք կարող ենք շատ այլ հետաքրքիր նյութեր նկարահանել, այն մասին, որ Հայաստանն այնքան էլ միատարր երկիր չէ»,-ներկայացնելով ֆիլմը, ասել է հեղինակը` թբիլիսահայ Վիկտորիա Մակսոևան:
Ֆիլմի ստեղծման գործում իր ներդրումն է ունեցել նաև Վրաստանում Հայաստանի նախկին դեսպան Հովհաննես Մանուկյանը, ում խոսքով սա հերթական գեղեցիկ ծրագիրն է, որը պետք է դիտարկել հայ-վրացական հարաբերություննների համատեքստում:
« Ճիշտ է վրացիները Հայաստանում մեծ թիվ չեն կազմում. նրանք մեր փոքրաթիվ համայնքերից են, որ իրապես մեր հարստությունն են: Հայաստանում ապրող ազգային բոլոր փոքրամասնությունները մենք մեր հարստությունն ենք համարում: Վրաստանն այդ առումով, իհարկե, ավելի հարուստ երկիր է, որովհետև բազմաթիվ ազգություններ են ապրում: Մենք պետք է ամեն ինչ անենք, որ Հայաստանում վրացիներն իրենց զգան ինչպես տանը, նույն էլ պետք է անի Վրաստանն այստեղ ապրող փոքրամասնությունների, այդ թվում հայերի նկատմամաբ: Այս ամենը կարևորում եմ երկկողմ հարաբերությունների տեսանկյունից. մենք այսօր ապրում ենք բարդ տարածաշրջանում ու ժամանակաշրջանում և մեր առջև ծառացած մարտահրավերներին դիմակայելու համար պետք է ամրապնդենք մեր կապերն ու բարեկամությունը. միասին մենք ավելի ուժեղ կլինենք և ավելի արդյունավետ կհաղթահարենք դժվարություններն ու մարտահարավերները»:
