Այսօր լրանում է հայ արձակագիր, ՀԽՍՀ մշակույթի վաստակավոր գործիչ, սոցիալիստական աշխատանքի հերոս Սերո Խանզադյանի ծննդյան 100-ամյակը: Կոմիտասի անվան պանթեոնում այսօր նրա շիրիմի մոտ հարգանքի տուրք էին նրա գրականությունը գնահատողները, մտերիմներն ու գրչակից ընկերները:
1915 թվականի այս օրը Գորիսում ծնվել է հայ արձակագիր, ՀԽՍՀ մշակույթի վաստակավոր գործիչ, սոցիալիստական աշխատանքի հերոս, բազում մրցանակների դափնեկիր Սերո Խանզադյանը: Գրական առաջին քայլերը կատարել է 1934 թվականին, երբ «Կարմիր Զանգեզուր» թերթում լույս է տեսել նրա առաջին պատմվածքը՝ «Չոր տափը»։ Այն ճանապարհ է բացել գրողի հետագա գործունեության համար:
Այսօր Խանզադյանի գրչակից ընկերները նրա ստեղծագործություններն առանձնացնում են տոհմիկ ազգային նկարագրի իմացությամբ: Նրա «Մխիթար Սպարապետ», «Հայերենապատում», «Հողը», «Թագուհին հայոց», «Անդրանիկ» վեպերով եւ հրապարակախոսական հոդվածներով ու պատմվածքներով դաստիարակվել են սերունդներ:
Սերո Խանզադյանի գործերը ներկայացնում են հայ ժողովրդի պայքարի ոգին, հաղթանակի դժվարին ճանապարհը: Սերո Խանզադյանը նաեւ արցախյան ազատամարտի մասին տասնյակ հոդվածների հեղինակ է։ «Սերո Խանզադյանը քայլող պատմություն է: Մեր ժողովրդի քայլող պատմությունը: Այդ պատմության թռիչքների ու գահավիժումների, ողբերգությունների ու հանդիսությունների, նրա աստեղային ժամերի և ասուպային վայրեջքների քաջահմուտ տարերքն ու վկան»,- այսօր Համո Սահյանի խոսքերն էր հիշում Գրողների միության նախագահ Էդուրադ Միլիտոնյանը։
Նա արձակագրի մասին բազում հիշողություններ ունի, որոնք էլ այսօր կիսեց լրագրողների հետ: Հիշում է՝ Գրողների միության իր երաշխավորագիրը գրել է Սերո Խանզադյանը, բազում ճանապարհորդությունների միասին են մեկնել, հումորով համեմված նրա խոսքի հետ ոչինչ չես փոխի ասում է: «Ամենամեծ խրատը, որ տվել է. նախ ասել է պետք է լինես ազնիվ, արդարախոս, ճշտապահանջ, աշխատասեր»:
Հայաստանը պայծառ տեսնելու գործում միշտ առաջամարտիկ արձակագրից հիշողությունները չեն խունացել նաև գրող Դավիթ Գասպարյանի մտապատկերում: 1988 թվականին, երբ սկսել է գրել «Փակ դռների գաղտնիքը» հոդվածաշարը, Սերո Խանզադյանը եղել է նրա միակ խորհրդատուն և գոտեպնդողը: Ասում է շատ էր հետաքրքրվում Ակսել Բակունցի հուշերով, որոնց մասին էլ անդրադարձել է իր հուշապատումներում:
