Հովհաննես Թումանյանի անվան պետական Տիկնիկային թատրոնն 80 տարեկան է: Ստեղծագործական ուղին սկսել է «Չարաճճի Պետիկը» և «Շունն ու կատուն» բեմադրություններով: Բազմամյա պատմություն անցած թատրոնի կարևորագույն գաղափարը՝ քայլել ժամանակին համահունչ և մնալ երիտասարդ: հիմնադրումից ի վեր թատրոնը մասնակցում է թատերական փառատոների Եվրոպայում և ողջ աշխարհում՝ ստանալով բազմաթիվ մրցանակների: Թատրոնի 80-ամյա հոբելյանը մեկնարկել է Անի Հովակի նկարների ցուցահանդեսով, որը ներկայացված է թատրոնի սրահներից մեկում: Իսկ վաղը կկայանա մշակութային այս օջախի 80-ամյակին նվիրված հոբելյանական երեկոն:
Իմաստության և մանկամտության համաձուլումից ստացվում է Տիկնիկային թատրոն: Թատրոնը 1988 թվականից ղեկավարող Ռուբեն Բաբայանը նշում է, որ այն ով չգիտի ինչ է թատրոնը անընդհատ փնտրտուքների մեջ է, իսկ երբ հասկանում ես թատրոնն ինչ է, ապա ժամանակն է փոխել գործունեության ոլորտը:
«Մենք այդ փնտրտուքների մեջ ենք, թե ինչը թատրոն չի մենք գիտենք, սակայն չգիտենք ինչ է թատրոնը»:
Հենց այս չիմացությունն էլ հնարավորություն է ընձեռում թատրոնի անձնակազմին մշտապես փնտրել բեմական նոր ձևեր, նոր լեզու: Տիկնիկային թատրոնի որդեգրած քաղաքականությունն է՝ համահունչ քայել թատերական միջազգային կյանքին, ինչը, թատրոնի գրական մասի վարիչ Արա Խզմալյանի վստահեցմամբ, իրականացվում է բարձր մակարդակով:
«Դրա վկայությունն է թատրոնի տարբեր ռեժիսորների բեմադրությունները փառատոնների մասնակցելը»:
Իսկ նոյեմբերի 24-ին Գերմանիայում անցկացվող միջազգային փառատոնին թատրոնը կմասնակցի Աիդա Սիմոնի «Պրո Շամիրամ» բալետային ներկայացմամբ: Չնայած իր անցած դժվարին ուղուն՝ Տիկնիկային թատրոնը կերտել է հարուստ պատմություն: Չի դադարել աշխատել նույնիսկս պատերազմական տարիներին: Թատրոնի գեղարվեստական ղեկավարը հիշում է, երբ 1988 թվականի արցախյան պատերազմի տարիներին հանրահավաքի մասնկիցները երեխաներին թողնում էին թատրոնում:
Մշտարթուն թատրոնն իր այս տարվա ընթացքում 6 նոր ներկայացում է ցուցադրել: Հիմա էլ պատրաստվում են Նոր տարվա ներկայացմանը: Երեխաների բարոյահոգեբանական և գեղագիտական կրթությամբ զբաղվող մշակութային օջախի նպատակն է ներկայացվող հեքիաթները փոքրիկ հանդիսատեսին մատուցել այնպես, որ արտացոլի այսօրվա օրը: Թատրոնի խաղացանկում թումանյանական մոտ 7 գործ, որոնք թեև պահպանել են հեղինակի խորը հոգին, սակայն բեմադրվել են ժամանակի պահանջներին համահունչ:
Թատրոնն արդեն աշխատում է 2016 թվականի ծրագրերի շուրջ: Առաջին անգամ խաղացանկում կներկայացվեն ստվերային ներկայացումներ, կվերականգնվեն մի քանի լավագույն ներկայացումներ՝ Ղազարոս Աղայանի «Անահիտը», Հիսուս Քրիստոսի ծննդյան պատմությունը կմատուցվեն նորովի:
