«Նախաբեմ» կրթամշակութային ասոցիացիա հասարակական կազմակերպության նախաձեռնությամբ և ՀՀ մշակույթի նախարարության աջակցությամբ հոկտեմբերի 25-ից 30-ը Երևանում «Վերածնունդ» խորագրի ներքո անցկացվելու է «Նռան հատիկ-2015» մանկապատանեկան 15-րդ հանրապետական թատերական փառատոնը, որին մասնակցելու է ԼՂ-ից և Հայաստանից 30 թատերախումբ: Նախորդ տարիներին փառատոնին մասնակցել են նաև Սփյուռքի հայկական մշակութային կենտրոններից թատերախմբեր, սակայն Մերձավոր Արևելքում պատերազմական իրավիճակի պայմաններում սաները չեն կարողացել գալ Երևան, սակայն ուղարկել են նկարահանված իրենց ներկայացումները:
«Վերածնունդ» խորագրի ներքո հոկտեմբերի 25-ից 30-ը մայրաքաղաքը կողողվի մանկապատենական թատերախմբերով: 30 թատերախումբ, որից 6-ն առաջին անգամ է մասնակցում փառատոնին, կներկայանա 35 ներկայացմամբ: Թեև փառատոնը կրում է «Վերածնունդ» խորագիրը, սակայն «Նախաբեմ» կրթամշակութային ասոցիացիայի նախագահ Գարիկ Ղազարյանի խոսքով՝ ոչ բոլոր ներկայացումներն են նվիրվելու Հայոց ցեղասպանության 100-րդ տարելիցին:
Տարբեր տարիներին «Նռան հատիկ»-ին մասնակցել են թատերախմբեր նաև Սփյուռքից, Ջավախքից և ԼՂՀ-ից: Փառատոնի բազմամյա գործունեության տարիներին այս տարի առաջին անգամ ներկայացումներ կցուցադրվեն նաև օնլայն տարբերակով: Մերձավոր Արևելքում տիրող իրավիճակի պայմաններում Սփյուռքի հայկական մշակութային կենտրոնի սաները չեն կարողացել մեկնել Երևան, սակայն ուղարկել են իրենց ներկայացումների տեսագրությունները:
Այն, որ փառատոնը տալիս է պտուղներ, փաստում է նաև «Նախաբեմ» կրթամշակութային ասոցիացիայի նախագահ Գարիկ Ղազարյանը: «Մեր մասնակիցներից շատերն ընդունվել են Երևանի թատրոնի և կինոյի պետական ինստիտուտ, երիտասարդներից շատերն արդեն ավարտել են և աշխատում են թատորնի ոլորտում: Ուրեմն ինչ որ մի արդյունք կա»:
ՀՀ մշակույթի նախարարության աշխատակազմի ժամանակակից արվեստների վարչության գլխավոր մասնագետ Նաիրա Հայրապետյանն էլ իր հերթին նշեց, որ փառատոնի նպատակն է աջակցել մանկապատանեկան թատերական արվեստի զարգացմանը, համախմբել և համակարգել գործող թատերական մանկապատանեկան խմբերը, աջակցել նորերի ստեղծմանն ու կայացմանը: Փառատոնի կազամեկրպիչների նպատակն է թատերական արվեստի միջոցով մատաղ սերնդին տալ գեղագիտական և բարոյական դաստիարակություն:
Փառատոնի կազմակերպիչ «Նախաբեմ» կրթամշակութային ասոցիացիա հասարակական կազմակերպությունը, կարևորելով թատերական կրթության զարգացման հիմնահարցերը, նպատակ ունի թատրոն առարկան ընդգրկել դպրոցական ծրագրերում: Առարկան արդեն 25 տարի է դասավանդվում է Անանիա Շիրակացու անվան ճեմարանում:
«Ունենք ևս մեկ երազանք: Դա թատերական քոլեջ-վարժարանի ստեղծումն է»:
«Նռան հատիկ» փառատոնի պատվավոր նախագահ Հասմիկ Կարապետյանի վստահեցմամբ էլ՝ փառատոնի շրջանակներում ցուցադրվող ներկայացումները հնարավոր կլինի ներկայացնել նաև մանկապարտեզներում՝ եթե նախակրթարանում ապահովվեն բեմական պայմանները:
