Այսօր Արագածոտնի մարզի Արտենի համայնքի թիվ 1 միջնակարգ դպրոցում բացվել է հիմնանորոգված մարզադահլիճը: Այն իրականացվել է <<Հայաստանի մանուկներ>> հիմնադրամի, Գերմանիայի <<Նաիրի>> հասարակական կազմակերպության, Գերմանիայի ամենուժեղ մարդը ճանաչված ծանրամարտիկ Պատրիկ Բաբումյանի և Արա և Սոնյա Հասեթների աջակցությամբ: Դպրոցում նշվել է նաև բերքի տոնը։ Այս դպրոցում սովորում է 350 աշակերտ:
Առատ բերք ու բարիք, դպրոցի վերանորոգված մարզադահլիճ, հյուրեր, որոնք էլ Արագածոտնի մարզի Արտենի համայնքի աշակերտների համար շաբաթվա սովորական օրը տոն էին դարձրել: Աշակերտները դասարան առ դասարան ազգային ուտեստներով, բանջարեղենով, մրգերով և քաղցրավենիքներով զարդարել էիր սեղանները և իրենց հարկի տակ հյուրընկալել դպրոցի բարեկամներին, որոնց ներդրումների շնորհիվ դպրոցում ստեղծվում են սովորելու համար անհրաժեշտ պայմանները:
Երեխաներն ազգային կերակրատեսակները համադրել էին նորի հետ և զարգացրել երևակայությունը: Սեղաններին կային փշատենու ճյուղեր, փոխնդե գնդեր, թանապուր, բանջարեղենից զարդարված տարբեր պատկերներ:
Այսօր բացվեց նաև Արտենիի թիվ 1 միջնակարգ դպրոցի վերանորոգված մարզադահլիճը, որը հիմնանորոգվել էր մի քանի արտասահմանցի բարերարների օժանդակությամբ և <<Հայաստանի մանուկներ>> հիմնադրամի աջակցությամբ:
<<Ռադիոլուրը>> մեկ տարի առաջ անդրադարձել էր Արտենիի երեխաների ֆիզիկական պատրատվածության խնդրին, ովքեր ֆիզկուլտուրայի ժամերը հիմնականում անցկացրել են դրսում գնդակ խաղալով: Այսուհետ երեխաները մարմնակրթության դասերը կանցկացնեն դահլիճում:
Արտենիի թիվ 1 միջնակարգ դպրոցի տնօրեն Մանուշակ Շատոյանը ուրախությամբ նշեց համագործակցության մասին ու գոհունակություն հայտնեց բարերարներին: Դպրոցում սովորում է 350 աշակերտ:
<<Հայաստանի մանուկներ>> հիմնադրամը դպրոցի լավագույն բարեկամներից է և օգնում է երեխաներին ապրել առողջ, զարգացնել նրանց հմտություններն ու կարողությունները: <<Հայաստանի մանուկներ>> հիմնադրամի փոխտնօրեն Ինեսա Գրիգորյանը նշեց, որ Արտենիում աշխատում են 2008 թվականից :
Նորաբաց մարզադահլիճում զգացվում է գույքի պակաս, ինդի մասին նշեց նաև ֆիզկուլտուրայի ուսուցիչ Կարեն Անտոնյանը: Սպորտի և երիտասարդության հարցերի նախարարության մասսայական սպորտի և ֆիզիկական դաստիարակության քաղաքականության վարչության պետ Եղիշ Դավթյանը խոստացավ մասամբ օգնել գույքով: Նա համագործակցելով COAF-ի հետ Արմավիրի և Արագածոտնի մարզերի մի քանի դպրոցներում անցկացնում է բասկետբոլի պարապմունքներ, վերապատրաստում ֆիզկուլտորայի ուսուցիչներին:
Հավելեմ, որ վերականգնման խիստ կարիք ունի նաև Արտենիի թիվ 2 հիմնական դպրոցը, որն ուշադրությունից դուրս է մնացել:
