Ուկրաինայի Գերագույն ռադան «Նաֆտոգազ» ընկերության ղեկավար Սերգեյ Կորեցկուն հաստատել է երկրի նոր վարչապետի պաշտոնում։ Նա կփոխարինի Յուլիա Սվիրիդենկոյին, որը կառավարությունը ղեկավարում է մեկ տարի։
Միաժամանակ՝ Ուկրաինայի մի շարք քաղաքներում պաշտպանության նախարար Միխայիլ Ֆյոդորովի պաշտոնանկության դեմ բողոքի ակցիաներ են սկսվել, հայտնում է BBC- ին։
Կորեցկու թեկնածության օգտին քվեարկել է 289 պատգամավոր։ Այսօր ավելի ուշ խորհրդարանը պետք է նաեւ նոր նախարարների նշանակման հարցով քվեարկություն անցկացնի։
Հուլիսի 12-ին Ուկրաինայի նախագահ Վոլոդիմիր Զելենսկին հայտարարել էր կառավարության հրաժարականի մասին՝ նշելով, որ երկիրը «փոխում է իր քաղաքական ռազմավարությունը»։
«Ուկրաինսկայա պրավդա» պարբերականի աղբյուրների տվյալներով՝ Զելենսկին վաղուց էր հետեւում Կորեցկու աշխատանքին եւ նրան համարում է «պետական կառավարման ամենաուժեղ մենեջերներից մեկը»։
Հինգշաբթի առավոտյան Ուկրաինայի մի շարք քաղաքներում՝ Կիեւում, Իվանո-Ֆրանկիվսկում, Օդեսայում, Դնեպրում եւ Լվովում, սկսվել են բողոքի ակցիաներ՝ ընդդեմ պաշտպանության նախարար Միխայիլ Ֆյոդորովի պաշտոնանկության։
Ցուցարարները պահանջում են Ֆյոդորովին թողնել պաշտպանության նախարարի պաշտոնում՝ պարզելով «Մի՛ քանդեք այն, ինչը գործում է» եւ «Վերադարձրեք Ֆյոդորովին» գրություններով պաստառներով։
Ֆյոդորովի պաշտոնանկության ֆոնին հրաժարական է տվել նաեւ Ուկրաինայի ռազմաօդային ուժերի հրամանատարի տեղակալ Պավել Ելիզարովը։ Հրաժարականի իր զեկույցում նա Ֆյոդորովին անվանել է «երկրի հակաօդային պաշտպանության ոլորտում ռազմավարական բարեփոխումների նախաձեռնող», ընդգծելով, որ դրանց արգելափակումը կհանգեցնի Ուկրաինայում բազմաթիվ զոհերի եւ ավերածությունների։
Ելիզարովը նաեւ հայտարարել է, որ Ֆյոդորովի հեռացումը «մեծ վնաս կհասցնի երկրի պաշտպանունակությանը»։
Financial Times-ի Կիեւի թղթակից Քրիստոֆեր Միլլերի տեղեկություններով՝ մինչ նախագահականի շենքի մոտ հավաքվում են բողոքի ակցիայի մասնակիցները, Զելենսկին իր աշխատակազմի ղեկավար Կիրիլ Բուդանովի հետ քննարկում է Ֆյոդորովի պաշտոնանկությամբ պայմանավորված ճգնաժամից դուրս գալու ուղիները։
Ֆյոդորովը պաշտպանության նախարար էր նշանակվել 2026 թվականի հունվարին, մինչ այդ նա ղեկավարում էր թվային փոխակերպման նախարարությունը։
«Ուկրաինսկայա պրավդա» պարբերականի տվյալներով՝ չորեքշաբթի օրը Զելենսկին հանդիպել է «Ժողովրդի ծառա» խմբակցության անդամների հետ եւ հայտնել, որ որոշել է փոխարինել Ֆյոդորովին, քանի որ վերջինս հակասությունների մեջ է Ուկրաինայի զինված ուժերի գլխավոր հրամանատար Ալեքսանդր Սիրսկու հետ։
«Նա ասաց, որ, ըստ էության, պետք է ազատել եւ՛ Ֆյոդորովին, եւ՛ Սիրսկուն, սակայն այժմ դա անել չի կարող»,- պարբերականին պատմել է հանդիպման մասնակիցներից մեկը։
Ռադայի մի շարք պատգամավորների տեղեկություններով՝ պաշտպանության նախարարի պաշտոնում կարող է նշանակվել Իգոր Կլիմենկոն, որը 2023 թվականի փետրվարից զբաղեցնում է Ուկրաինայի ներքին գործերի նախարարի պաշտոնը։
