Ինդոնեզիայի Հալմահերա կղզում (Հյուսիսային Մալուկու նահանգ) գրանցվել է Դուկոնո հրաբխի ժայթքում, հայտնում է Ինդոնեզիայի Հրաբխագիտության և երկրաբանական աղետների կենտրոնը։
Ըստ կենտրոնի տվյալների՝ մոխիրը հրաբխի խառնարանից բարձրացել է 1,3 կմ և ծովի մակարդակից հասել 2 387 մետր բարձրության։ Սպիտակ և մոխրագույն երանգների մոխրի արտանետումները տարածվել են դեպի հյուսիս-արևմուտք։ Հրաբխագիտական կենտրոնը հորդորել է մերձակա շրջանների բնակիչներին ու զբոսաշրջիկներին չմոտենալ հրաբխի խառնարանին 4 կմ շառավղով, ինչպես նաև կրել դիմակներ՝ շնչառական օրգանները մոխրից պաշտպանելու համար։
Աշխարհի խոշորագույն Ինդոնեզական կղզեխումբը, որը բաղկացած է 18 հազար կղզիներից, գտնվում է խաղաղօվկիանոսյան «Հրե օղակում», տարածաշրջանը սեյսմիկ ակտիվ է։ Ինդոնեզիայում կա ավելի քան 500 հրաբուխ, որոնցից մոտ 130-ը գործող են։
