Բնապահպաններն ու փորձագետները շարունակում են պնդել՝ հանքի շահագործումը վտանգավոր է: Կորցնում ենք Սևանը, Ջերմուկը և ոչ միայն: Այսօր Երևանում Ամուլսարի ծրագրի հետ կապված հերթական քննարկումն էր կազմակերպվել:
Հնչել են քննադատություններ, բերվել են փաստարկներ: «Ռադիոլուրը» նաև լսել է «Լիդիան Արմենիայի» ներկայացուցչի դիտարկումները։
Ամուսլարի ծրագրի շուրջ կրքերը չեն հանդարտվում: Շինարարությունն սկսված է։ Բնապահպաններն ու փորձագետները շարունակում են ահազանգել՝ ծրագիրը վտանգավոր է: Փաստարկները նույնն են՝ կկորցնենք Սևանա լիճն ու Ջերմուկը որպես առողջարանային քաղաք:
Սևան ազգային պարկի նախկին տնօրեն, բնապահպան Գագիկ Սուխուդյանը «Ռադիոլուրի» հետ զրույցում մեկ անգամ ևս ընդգծում է՝ Ամուլսարի շահագործումն իսկապես խնդրահարույց է:
«Ջերմուկի հանքային ստորգետնյա ջրերը նույնպես վտանգում ենք: 15 կամ 150 տոննա ոսկի եթե կորզենք, երկրորդ Սևան կամ Ջերմուկ չենք կարող կառուցել»:
Աշխարհագրագետ Լևոն Գալստյանը նկատում է՝ Ամուլսարի տարածքում են ձևավորվում Հայաստանի կարևորագույն քաղցրահամ ջրային պաշարները: Ամուլսարի այլընտրանքը գյուղատնտեսության զարգացումն է՝ ասում է, պետք էր ընդամենը դա զարգացնել։ Այնտեղ մինչ այժմ չաղտոտված տարածք է:
ԳԱԱ էկոլոգոնոոսֆերային հետազոտությունների կենտրոնի տնօրեն Արմեն Սաղաթելյանն ընդգծում է՝ ծանր մետաղները բնակչության և կհամակարգի համար են վտանգավոր, պարզաբանում է՝ դրանք քաղցկեղածին են:
Սաղաթելյանը նկատում է՝ եթե Ամուլսարի հանքավայրը շահագործվեր փակ եղանակով, ապա ռիսկը փոքր ինչ կնվազեր: Հանքավայրը,սակայն, բաց եղանակով է շահագործվելու:
«Լիդիան Արմենիան» ընկերության կայուն զարգացման գծով տնօրեն Արմեն Ստեփանյանը «Ռադիոլուրի» հետ զրույցում հակադարձում է՝ իրենք նույնպես սիրում են Ջերմուկն ու Սևանը, ՀՀ քաղաքացիներ են նաև իրենց երեխաները:
Զրուցակիցս նշում է՝ սնդիկի առկայություն կա նաև իրենց գնահատականներում, սակայն դրա՝ մեծ քանակով շրջակա միջավայր արտահանման հնարավորությունն է քիչ: «Սնդիկը առաջանում է ձուլարանում, գործընթացի ոչ մի փուլում սնդիկի խնդիր չկա»:
«Լիդիան Արմենիա»-ի ներկայացուցիչը նշում է՝ նախագծի քննարկման սկզբում հանքավայրի շահագործման բոլոր եղանակներն են քննարկել, նաև՝ հանքավայրի փակ շահագործման: Սակայն, քննարկողներն էլ գիտեին, որ այս հանքավայրի շահագործումը փակ եղանակով նպատակահարմար չէ: Քննադատություններին այստեղ ըմբռնումով են մոտենում: Վստահեցնում են՝ լուրջ հետազոտություններով ու գիտականորեն են պատասխանում հնչող քննադատություններին:
