Հայաստան-ԵՄ համապարփակ և ընդլայնված գործընկերության մասին համաձայնագրում ատոմակայանին վերաբերող կետերը առաջ քաշեցին Հայաստանի այլընտրաքային էներգետիկայի անցնելու հարցը:
Բնապահպանների ու մասնագետների կարծիքներն այս հարցում տարբեր են: Ամբողջովին անցնել այլընտրաքային էներգետիկայի, թե միևնույն ժամանակ զարգացնել ատոմային էներգետիկան:
Այլընտրանքային էներգետիկա, թե ատոմային: Այս հարցում մասնագետների կարծիքներն իրարամերժ են: «Հանուն մարդկային կայուն զարգացման ասոցիացիա» ՀԿ նախագահ Կարինե Դանիելյանը դեմ է ատոմային էներգետիկային: Մինչ Չերմոբիլի պայթյունը դեմ ենք եղել ատոմակայանի կառուցմանը, սակայն էներգետիկ բլոկադայի պայմաններում ուրիշ ճանապարհ չկար` ասում է: Բնապահպանը կարծում է, որ այլընտրանքային` հատկապես արևային էներգիայի պետք է վաղուց անցնեինք:
ՀՀ- ԵՄ համապարփակ և ընդլայնված գործընկերության մասին համաձայնագրում հայկական ատոմակայանին վերաբերող կետերը, Կարինե Դանիելյանի գնահատմամբ, ընդհանուր են։ Այնտեղ նշվում է, որ Մեծամորի ատոմակայանը պետք է փակվի և էներգետիկայի աղբյուրները լրացնելու ուղղությամբ մշակվի ճանապարհային քարտեզ: Սակայն հայկական կողմից հայտարարել են, որ խոսքը չի վերաբերում ամբողջ ատոմակայանին, դա միայն 1-ին էներգաբլոկի մասին է, որը պետք է վերացնել և ապահովել դրա անվտանգ կոնսերվացիան:
Ունենալով համապատասխան ռեսուրսներ՝ բնապահպանի համար անհասկանալի է, թե ինչու է հելիոէներգետիկան զարգանում պանելների օգտագործման ճանապարհով: Միևնույն ժամանակ մտահոգություն հայտնում տարածքների հետ կապված, քանի որ այդ պանելների համար անհրաժեշտ են մեծ տարածքներ:
«Հայաստանի հելիոֆիկացման ծրագրի հեղինակ Վահան Համազասպյանը կարծում է, որ ատոմային էներգետիկային զուգահեռ պետք է զարգացնել այլընտրաքային էներգետիկան: Որպես ինժեներ կողմ է ատոմային կայանի աշխատանքին, բայց ոչ այս էներգաբլոկի: Սա պետք է կանգնեցվի, նոր էներգաբլոկ կառուցվի: Գործող էներգաբլոկի ռեսուրսը սպառվել է և վտանգավոր է՝ ասում է: Հայաստանին ատոմակայանը պետք կլինի, եթե մենք զարգացնենք այլընտրանքային մյուս աղբյուրները ևս: Օրինակ՝ արևային էներգետիկան: Հայաստանը, ըստ Համազասպյանի, պետք է դարձնել արևային էներգետիկայի զարգացման հիմնական երկիր:
«Մենք ամեն տարի հրաժարվում ենք և ամեն տարի կորցնում ենք 1 մլրդ դոլարի էներգառեսուրսներ անհասկանալի պատճառներով»:
«Ռադիոլուրի» հարցին, արդյո՞ք Հայաստանն ունի անհրաժեշտ տարածքներ՝ արեւային կայաններ կառուցելու համար՝ արևային էներգիայի փորձագետ Հայկ Շեկյանը նշեց՝ 1 մեգավատ հզորություն ունեցող արևային կայանի համար անհրաժեշտ է մոտ 1.5 հեկտար տարածք: Գյուղատնտեսության համար նախատեսված հողերն այս ծրագրի համար օգտագործելը սխալ կլինի, բացի այդ՝ նման հողերը թանկ են, իսկ ոչ մի ներդրող այդ տարածքում կայան չի տեղադրի։ Ավելի նպատակահարմար է օգտագործել անջրդի տարածքները՝ ասում է փորձագետը:
Շեկոյանը վստահեցնում է՝ բնապահպանական տեսանկյունից արեւային կայաններն անվնաս են և 35-40 տարվա կյանք ունեն:
