ԿարևորՀասարակություն

Հայաստանում բարձր ջերմային ֆոնը կպահպանվի, Մեղրիում կլինի մինչեւ 42 աստիճան

karenghazaryan

Առաջիկա օրերին Հայաստանում կպահպանվի բարձր ջերմային ֆոնը, հրդեհավտանգ իրավիճակը կշարունակի մնալ բավականին բարձր, լրագրողների հետ հանդիպման ժամանակ այսօր տեղեկացրել է Հիդրոմետ ծառայության օդերեւութաբանության կենտրոնի պետի տեղակալ Գագիկ Սուրենյանը: Նրա խոսքով՝ տարին աննախադեպ էր շոգերի տեւողության առումով, օդերեւութաբանության պատմության մեջ վերջին 170 տարում նման տեւական շոգեր չեն եղել: Օդերեւութաբանը նման իրավիճակը պայմանավորում է գլոբալ տաքացումների հետ, ինչը մտահոգիչ երեւույթ է ամբողջ մարդկության համար:

Գագիկ Սուրենյանի խոսքով՝ ինչպես կանխատեսվում էր Հայաստանում հերթական, արդեն թվով երրորդ ջերմային ալիքն սկսվել է օգոստոսի 10-ից: Այն մեր հանրապետություն է ներթափանցել Իրաքի տարածքից: Երեկ ամենաբարձր ջերմաստիճանը՝ 40.8,  գրանցվել է Երեւանի «Էրեբունի» օդերեւութաբանական կայանում:

Առաջիկա հինգ օրերին եղանակակլիմայական պայմաններում փոփոխություններ առանձնապես չեն սպասվում: ՀՀ ՏԿԱԻՆ Հիդրոմետ ծառայության օդերեւութաբանության կենտրոնի պետի տեղակալ Գագիկ Սուրենյանի փոխանցմամբ՝ ամենաշոգ օրերը կլինեն օգոստոսի 15-ն ու 16-ը, այսինքն՝ հանգստյան օրերը: Օդի ջերմաստիճանը կտատանվի 40-41 աստիճանի սահմաններում: Սպասվում է նաեւ գիշերային ջերմաստիճանի բարձրացում:

«Եթե նախորդ երկու օրերին Երեւանում գիշերային նվազագույն ջերմաստիճանները տատանվում էին 22-23 աստիճանների սահմաններում, ապա օգոստոսի 15-ին եւ 16-ին արդեն օդի ջերմաստիճանը գիշերը 27-28 աստիճանից չի նվազի: Ցերեկվա 40-41 աստիճանի տեւողությունը եթե անցած օրերի ընթացքում եղել է 1-2 ժամ՝ ցերեկվա ժամը 4-5-ն ընկած ժամանակահատվածում, ապա այդ տեւողությունը կերկարի եւ կպահպանվի մինչեւ 3 ժամ»:

Օգոստոսի 17-ին եւ 18-ին, օդերեւութաբանի կանխատեսմամբ, օդի ջերմաստիճանը չնչին՝ 1-2 աստիճանով կնվազի՝ տատանվելով 39-40 աստիճանի սահմաններում: Օգոստոսի 19-ին կրկին այն կբարձրանա եւ մինչեւ օգոստոսի 21-ը կպահպանվի 40-41 աստիճանի սահմաններում:

Գագիկ Սուրենյանի փոխանցմամբ, ըստ վիճակագրական տվյալների, Երեւանում 40 աստիճան ջերմություն լինում է միջինում 5 տարին մեկ անգամ: Այդ առումով աննախադեպ էր այս տարի: Արդեն մոտ 10 օր գրանցվում է օդի ջերմաստիճանը 40 եւ ավելի բարձ:

Բարձր ջերմային ֆոնով եւ անձրեւազուրկ օրերով պայմանավորված հանրապետությունում շարունակվում է պահպանվել բարձր կարգի հրդեհավտանգ իրավիճակը: «Տավուշի նախալեռներում եւ հովիտներում, Սյունիքի նախալեռներում եւ հովիտներում, Արարատյան դաշտավայրում եւ նախալեռնային գոտում վերջին կատեգորիայի՝ 5-րդ կարգի հրդեհավտանգ իրավիճակ է: Խնդրում ենք ազգաբնակչությանը եւ հորդորում՝ հրդեհներից խուսափելու համար լինել զգոն»։

Գյուղատնտեսներին ուղղված հորդորն է՝ կատարել ինտենսիվ ոռոգումներ, քանի որ օդի հարաբերական խոնավությունը շատ ցածր է, ցերեկներն այն իջնում է մինչեւ 15-20 տոկոսի, որի պայմաններում բույսերի մոտ տեղի է ունենում ուժեղ ջրազրկում: Օդերեւութաբանները բնակչությանը հորդորում են նաեւ ցերեկային ժամերին խուսափել արեւի ուլտրամանուշակագույն ճառագայթներից, օգտագործել շատ հեղուկներ՝ օրգանիզմն ավելորդ ծանրաբեռնվածությունից ազատելու համար: Խնդիրն այն է, որ երբ օդի ջերմաստիճանը գերազանցում է մարդու մարմնի միջին ջերմաստիճանը, այսինքն՝ 36.5 աստիճանը, ապա օրգանիզմն ընկնում է ջերմային սթրեսի մեջ:

Ամենաշոգ վիճակը կլինի Սյունիքի հովտային գոտիներում՝ Մեղրի, Ագարակ, որտեղ օդի ջերմաստիճանը կբարձրանա մինչեւ 42 աստիճան: Արարատյան դաշտավայրում այն կհասնի մինչեւ 41 աստիճանի: Ամենազով հատվածներն են Լոռին եւ Շիրակը՝ Աշոցք, Ամասիա հատվածը, Գեղարքունիքը եւ Վայոց Ձորի լեռնային շրջանները՝ Ջերմուկի հատվածը: Չնայած դրա՝ նույնիսկ այդ հատվածներում գրանցված ջերմաստիճանն աննախադեպ բարձր է նորմայից:

«Երեկ Գյումրիում գրանցվել է 36 աստիճան տաքություն, որը բացարձակ առավելագույն ջերմաստիճանն է, այսինքն՝ ջերմաստիճանը մոտեցել է պատմության ընթացքում երբեւիցե գրանցված աստիճանին: Նման բարձրությունների՝ ծովի մակերեւույթից 1500-1600 մետր բարձրությունների համար, 36 աստիճան ջերմությունը, դա կատաստրոֆիկ ջերմաստիճան է»:

Գագիկ Սուրենյանը նաեւ նշեց, որ օդի օրական միջին ջերմաստիճանը նորմայից բարձր է 6-7 աստիճանով: Շոգերի տեւողությունը աննախադեպ է օդերեւութաբանության պատմության մեջ, թեպետ՝ ջերմաստիճանի առումով ռեկորդը չի գերազանցվել՝ 2010 թվականի օգոստոսի 3-ին Երեւանում գրանցվել էր 42 աստիճան:

Եղանակային պայմանները կապված են գլոբալ կլիմայական փոփոխությունների հետ, ինչը համաշխարհային գիտական հանրության մտահոգության առարկա է դարձել, քանի որ այն մարդկային գործոնով է հիմնականում պայմանավորված:

Back to top button