Ամփոփել ու հանրությանը ոլորտ առ ոլորտ ներկայացնել վերջին մեկ տարվա ընթացքում կատարած աշխատանքները: Հովիկ Աբրահամյանի հանձնարարականն էր՝ կառավարության անդամներին: Նրանք ներկայացնում են ոչ թե օրացուցային մեկ տարվա, այլ՝ նախորդ տարի ձևավորված կառավարության աշխատանքային գործունեության մեկ տարվա արդյունքները: Բացառություն չէր նաև ՀՀ կառավարությանն առընթեր անշարժ գույքի կադաստրի պետական կոմիտեն, որի նախագահ Մարտին Սարգսյանն այսօր հանդիպել է լրագրողների հետ:
«Անշարժ գույքի հետ կապված գործարքների թիվը նվազել է, գնորդներ քիչ կան»,- ասում է Մարտին Սարգսյանը՝ Անշարժ գույքի շուկայում գործարքների նվազման պատճառը պաշտոնյան կապելով բանկային համակարգի լոյալության հետ, ռիսկային վարկեր չտրամադրելու հետ: Բանկերը լայնածավալ վարկեր չեն տրամադրում` թե հիփոթեքային, թե գյուղատնտեսական: Մարտին Սարգսյանը հույս է հայտնել, որ շուտով կառավարության վերջին որոշումներից հետո , գյուղատնտեսական վարկեր կտրամադրվեն, քանի որ կառավարությունը սուբսիդավորելու է դրանք: «Բանկերը, եթե վարկեր տրամադրեն, շուկան կաշխուժանա»:
Անդրադառնալով արդեն կատարված աշխատանքներին, Մարտիս Սարգսյանը հայտարարեց, որ նախանշված բոլոր միջոցառումներն ու գերակա խնդիրներն ամբողջությամբ կատարված են: Տարեցտարի ավելանում է նաև կոմիտեի նախագահի ու նրա տեղակալների հետ հանդիպել ցանկացող քաղաքացիների թիվը: Յուրաքանչյուր երկուշաբթի կառավարությանն առընթեր Անշարժ գույքի կադաստրի պետական կոմիտեում ընդունելության օր է: Մարտին Սարգսյանն այսօր էլ հիշեցրեց, որ ցանկանում են արտերկրի հայկական դեսպանատներում ու հյուպատոսարաններում նախատեսվում է ծառայություններ բացել:
Մարտին Սարգսյանն ընդգծեց, որ էլեկտրոնային փաստաթղթավորման արդյունքում Երևանի հինգ գրանսեյակները դարձել են երեքը, քաղաքացիները կարողանում են գնահատել ոլորտի վիճակն ու աշխատակիցների աշխատանքը: Անցումը էլեկտրոնային համակարգին բացառում է քաղաքացի պաշտոնյա շփումը, հետևաբար նվազեցնում է կոռուպցիոն ռիկսերը:
Ի դեպ, Կոմիտեն Հայոց Ցեղասպանության 100-ամյա տարելիցին ընդառաջ թեմատիկ քարտեզներ է պատրաստել, դրանք հանձնվելու են կրթական հաստատություններին:
