Հիշողություն, երախտագիտություն, կանխարգելում և վերածնունդ. ահա այն ուղերձները, որոնք Հայոց ցեղասպանության 100-րդ տարելիցի կապակցությամբ Հայաստանի Հանրապետությունը ցանկանում է հղել միջազգային հանրությանը և գալիք սերունդներին, այսօր «Ընդդեմ ցեղասպանության հանցագործության» երևանյան երկօրյա միջազգային գիտաժողովի բացմանն ասել է հանրապետության նախագահ Սերժ Սարգսյանը:
Ֆորումը մեկնարկել է վաղ առավոտյան, աշխարհի մոտ 5 տասնյակ երկրներից ավելի քան 600 ներկայացուցչի մասնակցությամբ: Գիտաժողովի երկու օերերի ընթացքում քննարկվելու են ցեղասպանությունների կանխարգելմանը, հետևանքների վերացմանը և պատասխանատվության խնդիրներին վերաբերող հարցեր: Համաժողովը պետք է հզոր, գործնական ուղերձ հղի աշխարհին՝ համատեղելու ջանքերը և վերջնականապես արմատախիլ անելու ցեղասպանություն կոչվող չարիքն ու այն ծնող հանգամանքները, բացման խոսքում ասել է Սերժ Սարգսյանը եւ նկատել. «Հայոց ցեղասպանության 100-րդ տարելիցին մենք բաց ճակատով ենք և վստահաբար հայտարարում ենք, որ այն, ինչին ցանկանում էին հասնել Հայոց ցեղասպանության կազմակերպիչները, չի հաջողվել: Ավելին, հայ ժողովրդին ոչնչացնելու փորձին մեր պատասխանը պետականության կառուցումն է, մեր վերածնունդն է, որն այսօր այլևս անշրջելի է»:
«Այլևս երբեք» ասելու վճռականությամբ մեր համեստ ներդրումն ունենանք հանուն բոլորիս միավորող համամարդկային նպատակի՝ ցեղասպանության կանխարգելման՝ նշել է հանրապետության նախագահն ու արդյունավետ աշխատանք մաղթել գիտաժողովի մասնակիցներին:
«Այսօրվա համաժողովը քննարկումներին զուգահեռ պետք է հզոր գործնական ուղերձ հղի միջազգային հանրությանն առ այն, որ ցեղասպանությունները բնավ չեն դադարել սպառնալիք հանդիսանալ մարդկության համար, որ դրանց հետևանքների հաղթահարումն ու կանխարգելումը պետք է դառնա կարևորագույն առաջնահերթություն: Անցյալի դասերը մեզ պարզապես պարտավորեցնում են դա անել: Քաղաքակիրթ մարդկությունը պետք է մեկտեղի իր ջանքերը՝ վերջնականապես արմատախիլ անելու ցեղասպանության չարիքը և այն ծնող հանգամանքները»,- ասել է հանրապետության նախագահը:
ՀՀ նախագահ Սերժ Սարգսյան
