ՀասարակությունՑեղասպանություն 100

Ապրիլի 24- ին Երեւան կայցելեն նաեւ Ամմանի քաղաքապետն ու Սանկտ Պետերբուրգի նահանգապետը

hasmikdilanyan

Համայն հայության մայրաքաղաք Երևանը  աշխարհասփյուռ հայերին ու Հայոց ցեղասպանության 100-ամյա տարելիցի օրը Ծիծեռնակաբերդ այցելող  հյուրերին հավուր պատշաճի կդիմավորի: Երևանի քաղաքապետարանը կազմակերպվող միջոցառումների վերջին շտկումներն է կատարում: Երևանի քաղաքապետի տեղակալ Արամ Սուքիասյանն այսօր նախատեսված միջոցառումների վերաբերյալ պարզաբանումներ է ներկայացրել: Հյուրերի համար Երևանի քաղաքապետարանը Հայոց ցեղասպանության պատմությունը ներկայացնող երկլեզու գիրք է հրատարակել: 

Մայրաքաղաք  Երևանի  բոլոր դպրոցների աշակերտների պատրաստած 400 հազար անմոռուկներին  ապրիլի 24-ին կմիանան նաև հանրապետության մյուս դպրոցների երեխաների պատրաստած անմոռուկներն ու կբաժանվեն  Ծիծեռնակաբերդի բարձունք այցելող հյուրերին: Իսկ Երևանում  բազմաթիվ   հյուրերին կմիանան նաև Ամմանի քաղաքապետն ու Սանկտ Պետերբուրգի նահանգապետը:

Երևանի քաղաքապետի տեղակալ Արամ Սուքիասյանի տեղեկացմամբ՝ բարեկարգվել է Ծիծեռնակաբերդի ճեմուղին, տեղադրվել են աղբամաններ ու նստարաններ: Տարածքում արգելվելու է բացօթյա առևտուրը.  բացառություն կկազմեն միայն ծաղկավաճառները, այն էլ՝ նախատեսված վայրերում՝ Հալաբյան փողոցի հատվածում՝  Հալաբյան Կիևյան ստորգետնյա  անցումում և Բարեկամությունից մինչև Օրբելի փողոցների հատվածում:

Ծիծեռնակաբերդի բարձունք այցելողներն այս տարի ջուր գնելու կարիք չեն ունենա, կառուցվել են 21 ցայտաղբյուրներ: Ապրիլի 24-ի առավոտյան  արարողակարգային միջոցառումներից հետո ժամը 13-ից արդեն Կիևյան փողոցի անկյունից Ծիծեռնակաբերդի ճեմուղին բաց կլինի քաղաքացիների համար:

Երթին զուգահեռ  կազմակերպվելու են մի շարք միջոցառումներ։ Ի տարբերություն նախորդ տարիների՝ այս  տարի դրանք զուգորդվելու են կենդանի կատարումներով: Ապրիլի 24-ին,  երբ   20։ 15-ին Հանրապետության հրապարակում մեկնարկի  «Վերածնունդ»  խորագրով մշակույթային միջոցառումը, Ծիծեռնակաբերդի հուշահամալիրի  հարևանությամբ  տեղադրված տեսաէկրանի միջոցով  կապահովվի ուղիղ հեռարձակումը:

Ապրիլի 24 –ին ժամը  13։00- ին  Բրազիլիայի հրապարակից (որն ավելի հայտնի է  Ստադիոն մարզադաշտի  հարակից տարածք)  Ծիծեռնակաբերդի բարձունք այցելած  քաղաքացիներին ավտոբուսներն անվճար  կտեղափոխեն մինչև Երևանի մետրոպոլիտենի  «Զորավար Անդրանիկ» ու «Բարեկամություն» կայարաններ: Մետրոպոլիտենն էլ ապրիլի 23 ու 24-ին կաշխատի մինչև գիշերը 01.00:

Ապրիլի 24-ին ժամը  22.30-ին մեկնարկելու է ջահերով երթը: Արամ Սուքիասյանն անդրադարձավ նաև  ապրիլի 24-ին մայրաքաղաքի  որոշ երթուղիների  փոփոխությանը: «Այն երթուղիները, որոնք կենտրոնով են անցնում, դրանք, բնականաբար, բնականոն հունով կաշխատեն:  Կլինեն  նաև երթուղիներ, որոնք որոշակի շրջապտույտ կունենան, որպեսզի կարողանան իրենց երթուղին ապահովել: Հանրապետության  հրապակարով անցնող բոլոր տրանսպորտային միջոցները , այդ թվում հասարակական տրանսպորտը, կփոխեն երթուղիները։ Հիմնականում կծանրաբեռնվի Խանջյան փողոցը:

Back to top button