Քաղաքական

Ալ.Արզումանյան.«Թուրքիայի որդեգրած ոչ ադեկվատ քաղաքականությունը ձանձրացնում է միջազգային հանրությանը»

lusinevasilyan
Միջազգային իրավունքի մասնագետ Վլադիմիր Վարդանյանի դիտարկմամբ՝ Եվրոպական խորհրդարանի կողմից ընդունված բանաձևը ոչ այնքան իրավական, որքան  բարոյաքաղաքական նշանակություն ունի: Ըստ նրա՝  փաստաթուղթն իր ազդեցությունը դեռ կունենա և արդեն ունի միջազգային գործընթացների  վրա: Մասնագետը հիշեցրել է, որ սա Եվրոպական խորհրդարանի երրորդ անդրադարձն է Հայոց ցեղասպանության դատապարտման թեմային: Եվրախորհրդարանի այս կոչը, սակայն, ըստ Վարդանյանի, հնչում է այլ համտեքստում և այլ ուղերձներով:

«Իրավական փաստաթուղթ լինելով հանդերձ՝ բանաձևը գուցե իրավական ազդեցություն չունենա, բայց բարոյաքաղաքական լուրջ ֆոն է ստեղծելու Հայոց ցեղասպանության ճանաչման, հերքումը դատապարտելու  գործընթացի համար ոչ միայն Թուրքիայում, այլև ամբողջ աշխարհում»:

Առաջին անգամ է, որ այս գործընթացում Հայաստանի Հանրապետությունը հանդես է գալիս որպես սուբյեկտ՝ այս դիտարկումն էլ Ցեղասպանությանը վերաբերող բանաձևի ընդունման առիթով արել է  ԱԺ «Ժառանգություն» խմբակցության պատգամավոր Ալեքսանդր Արզումանյանը: Նրա կարծիքով ՝ փաստաթղթում կարևոր շեշտադրումներ կան: Արզումանյանը Եվրախորհրդարանի բանաձևում ընդունման մեջ կարևոր է համարել նաև Հռոմի պապի հայտարարության ազդեցությունը: Ինչ վերաբերում է Թուրքիայի արձագանքին, ապա այն, ըստ նախկին արտգործնախարարի մեղմ ասած ադեկվատ չէ:

«Թուրքիան ոչ ադեկվատ, անհասկանալի դիրքորոշում է որդեգրել, և սա արդեն ձանձրացնում է միջազգային հանրությանը: Թուրքիան չի համակերպվում մտքի հետ, որ այլևս տարածաշրջանում կարևոր դերակատարներից  չէ: Հռոմի պապին մեղադրել կեղծարարության, ստի մեջ և սպառնալ՝ դրանք անհեթեթության հերթական դրսևորումներ են: Հուսանք, որ այս ոչ ադեկվատ գործողությունները կշարունակվեն և էլ ավելի հակադարձ ռեակցիա կառաջացնենք քաղաքակիրթ աշխարհում»:

Back to top button