Էջմիածնի համայնքային բյուջեի 2014 թվականի կատարողականը 100 տոկոսից ավելին է եղել: Սեփական եկամուտներն ուղղվել են քաղաքի բարեկարգմանն և մի շարք խնդիրների լուծմանը: Էջմիածնի քաղաքապետ Կարեն Գրիգորյանը նշել է, որ իր որդեգրած քաղաքականությունն ուղղված է բարեկարգ ու մաքուր քաղաքի կառուցմանը, որը կիրականացվի կառավարության և Մայր աթոռի հետ ակտիվ համագործակցությամբ:
Վաղարշապատ քաղաքի համայնքային բյուջեն անցած տարվա ընթացքում կատարվել է 111.4 տոկոսով, նախատեսված 1 միլիարդ 208 մլն դրամի փոխարեն հավաքագրվել է 1 միլիարդ 346 մլն դրամ: Սեփական եկամուտների հավաքարումը կատարվել է 126.4 տոկոսով: Բյուջեի կատարումը ենթադրում է քաղաքային համայնքում մի շարք խնդիրների լուծում՝ սկսած սոցիալ տնտեսական խնդիրներից մինչև քաղաքի բարեկարգում: Հոգևոր մայրաքաղաքում առաջին հերթին աչք շոյողը քաղաքի բարեկարգ ու մաքուր տեսքն է: Քաղաքում աղբահանությունը կատարվում է 2 օրը մեկ անգամ, իսկ որոշ փողոցներում էլ՝ ամեն օր: Էջմիածնի քաղաքապետ Կարեն Գրիգորյանը տեղեկացրեց, որ այն իրականացվում է 14 միավոր ինքնաթափերի միջոցով՝ օրական տեղափոխելով 210տ աղբ:
Քաղաքում ավելացել են կանաչապատ տարածքները: 2014թ-ին Վաղարշապատ քաղաքը տարածքային կառավարման նախարարության հետ համայնքների ասոցիացիայի կողմից անցկացված մրցույթում հաղթող է ճանաչվել «Ամենականաչապատ համայնք» անվանակարգում:
Քաղաքի արևմտյան հատվածում 7 հա-ի վրա 2 տարի առաջ հիմնվել է անտառաշերտ՝ վերականգնելով մութ ու ցուրտ տարիներին հատված անտառաշերտը:
Մեկ հեկտար տարածքի վրա նոր այգի է հիմնվել Արամ Մանուկյան թաղամասում, որտեղ հորատվել է մեկ ջրհոր: Կանաչապատ տարածքների բարեկարգման նպատակով 6 մլն. 540 հազար դրամով ձեռք է բերել ունիվերսալ 2 մինի տրակտոր, մեկ միլիոն 140 հազար դրամով էլ ՝ ձյուն մաքրող մեքենա:
Նախորդ տարվա ընթացքում վերանորոգվել է բազմաբնակարան 11 շենքի տանիք՝ 2824 քմ մակերեսով, որի համար ծախսվել է ավելի քան 20 մլն. դրամ, իսկ 5 շենքում էլ տեղադրվել են շքամուտքի դռներ:
Համայնքային բյուջեից հայրենական մեծ պատերազմի վետերաններին հաղթանակի օրվա և ամանորի կապակցությամբ տրվել է 450,0 հազար դրամի չափով ֆինանսական օգնություն: Դրամական աջակցություն է ցուցաբերվել ազատամարտիկների ընտանիքներին:
Հոգևոր մայրաքաղաքն առանձնանում է իր կրթամշակութային օջախներով, ավանդական միջոցառումներով, մարզական կյանքով:
Այս տարի Էջմիածինը նախապատրաստվում է նշել 3 կարևոր իրադարձություն՝ ցեղասպանության 100-րդ տարելիցը, հայրենական մեծ պատերազմի հաղթանակի 70-ամյակը և Վաղարշապատի 2700 ամյա հոբելյանը:
