ԿարևորՏնտեսական

ԵՏՄ ընդհանուր արժյութի առաջարկը հեռու է իրականությունից. ամեն ինչ անորոշ է

lenabadeyan

ԵՏՄ- ում  ընդհանուր արժույթի անցնելու առաջարկը, պարզվում է, այնքան էլ մոտ չէ իրականություն դառնալու համար: Հնչել է պարզապես առաջարկ, որի շուրջ դեռ պետք է մտածել: Նույնիսկ ռուսական կողմն է ասում, որ այս հարցում ամեն ինչ դեռ անորոշ է, եւ առաջարկը դեռ չի նշանակում, որ հենց վաղը պետք է անցնենք ընդհանուր արժույթի:

Եվրասիական տնտեսական հանձնաժողովի կոլեգիայի անդամ, նախարար Տատյանա Վալովայան Երեւանում այս առնչությամբ ասաց, որ ռուսական կողմն օգտվել է առաջարկ անելու իր իրավունքից, անկեղծանում է, որ այս պահին միությունն ինքը պատրաստ չէ անցնելու ընդհանուր արժույթի, իսկ ժամկետների առումով հիշեցրել է Եվրամիության օրինակը:

«Նախ եւ առաջ անհրաժեշտ է, որ պայմաններ լինեն այդ արժույթը ստեղծելու համար: Օրինակ՝ մենք բոլոր գիտենք ԵՄ փորձը, երբ 2001 թվականին շրջանառության մեջ դրվեց եվրոն, բայց առաջին անգամ փորձում էին այն շրջանառության մեջ դնել 1980 թվականին»:

Ընդհանուր արժույթի անցնելու համար նախ եւ առաջ անհրաժեշտ է կառուցել տնտեսական միությունը, ասում է տիկին նախարարը՝ միաժամանակ անհրաժեշտ համարելով ընդհանուր արժույթը: Հիշեցնում է, որ ռուբլու, դոլարի եւ դրամի վերջին տատանումների արդյունքում ռուսական շուկայում աշխատող հայ գործարարները դեռ շարունակում են վնասներ կրել:

Տատյանա Վալովայան, ի դեպ, այսօր հոռետես էր իր կանխատեսումներում: ԵՏՄ ապրանքաշրջանառությունից այս տարի էլ մեծ սպասելիքներ չունի: «Ամեն դեպքում պարզ է, որ այս տարի ՀՆԱ-ի աճը՝ նախորդ տարվա համեմատ, պակաս կլինի: Տնտեսական տեսանկյունից ԵՏՄ տարին բարդ է լինելու, բայց կարծում եմ, որ 2016 թվականին ճգնաժամից ելքն արդեն կտեսնենք»,- ասում է Եվրասիական տնտեսական հանձնաժողովի կոլեգիայի անդամ նախարարը։

Մարտի 20-ին Աստանայում, երբ հավաքվեցին ԵՏՄ անդամ երեք պետությունների նախագահները՝ առանց Հայաստանի ղեկավարի, քննարկվեց ոչ միայն միասնական արժույթի ստեղծման հարցը, այլեւ ԵՏՄ աշխատանքին առնչվող մի շարք այլ կարեւոր հարցեր:

Հայաստանը մտահոգված չէ այս նախադեպից։ Համենայնդեպս՝ այդպես է հավաստիացնում  ՀՀ փոխվարչապետ, միջազգային տնտեսական ինտեգրման եւ բարեփոխումների նախարար Վաչե Գաբրիելյանը: «Երբ Օլանդը եւ Մերկելը հանդիպում են, նրանք, բնականաբար, անդրադառնում են նաեւ ԵՄ հարցերին, սակայն երբեւէ չի նշվում, որ մնացած բոլոր երկրները եւս պետք է հանդիպեն: Դա ԵՏՄ պաշտոնական հանդիպում չէր, դա երեք երկրների նախագահների հանդիպում էր, որոնց թվում, բնականաբար, քննարկվել են նաեւ ԵՏՄ հարցեր: Ես չեմ կարծում, որ մենք պետք է այդ առումով հարցեր բարձրացնենք»,- ասում է։

Ինչ վերաբերում է «Բլումբերգ» հեղինակավոր պարբերականի այսօրվա կանխատեսմանը՝ Ռուսաստանի տնտեսության կայունացման վերաբերյալ, ապա որոշակի սպասելիքներ այս կայությունից, բնականաբար ունեն նաեւ Հայաստանում: «Հուսով ենք, որ կայունացնող պրոցեսն արդեն ընկավ իր հունի մեջ եւ դրանից հետո նաեւ Հայաստանի արտադրողների համար հատկապես շատ ավելի մեծ հստակություն կլինի գների արտահանման եւ այլնի առումով»։

Back to top button