Եվրոպական ժողովրդական կուսակցության կողմից Հայոց ցեղասպանության 100-րդ տարելիցին նվիրված բանաձևի ընդունումը «Ռադիոլուրի» հետ զրույցում ՀՀԿ փոխնախագահ Արմեն Աշոտյանը համարում է խոշոր ձեռքբերում` հաշվի առնելով ԵԺԿ քաղաքական դերը, կշիռը և նշանակությունը։
«Եվրոպական քաղաքական վերանախավը հաստատեց իր հավատարմությունը արժեհամակարգին: Պատահական չէ,որ բանաձևը կոչվում է «Հայոց ցեղասպանություն և եվրոպական արժեքներ»: Որպեսզի ամբողջությամբ գնահատենք ԵԺԿ քաղաքական համաժողովի այսօր ընդունած բանաձևը, պետք է ևս մեկ անգամ փաստել, որ ԵԺԿ-ն եվրոպական ուղղության խոշորագույն քաղաքական ընտանիքն է, որը մեծամասնություն է` թե՛ Եվրոպայի խորհրդարանում, թե՛ Եվրահանձնաժողովում»,- ասաց նա:
ՀՀԿ փոխնախագահը նշեց, որ այդ ուժի կողմից նման բանաձևի ընդունումը լրջագույն քաղաքական հաջողություն է` Հայոց ցեղասպանության հետևանքների վերացման հարցում։ Արմեն Աշոտյանը հատկանշական համարեց, որ Հայաստանից ԵԺԿ անդամ երեք քաղաքական կուսակցությունները` ՀՀԿ- ն, ՕԵԿ- ը եւ «Ժառանգությունը» միախմբվեցին ազգային կարևորություն ունեցող այս գործառույթը իրականացնելու համար։
ՕԵԿ խմբակացության քարտուղար Մհեր Շահգելդյանն էլ նշեց ,որ այս բանաձևի ընդունումը պետք է դիտարկել որպես եվրոպական համամարդկային և հումանիստական արժեքների ևս մեկ արտահայտություն։ «Կարևոր այն է, որ Հայոց ցեղասպանության ճանաչման որոշումը ուղղված պետք է լինի ներկային, և հետագայում էլ ցեղասպանություների կանխարգելմանը: Պատմությունը դիսկրետ չէ ու անցյալը, ներկան ու ապագան փոխկապակցված են»։ Ըստ Մհեր Շահգելդյանի՝ այս կարևոր որոշումն իր ազդեցությունն է ունենալու։
«Հայոց ցեղասպանության ճանաչումը լինելու և պատմական արդարությունը վերականգնվելու է»,- շեշտեց ՕԵԿ փոխնախագահը։
«Ժառանգություն» կուսակցության նախագահ Րաֆիի Հովհաննիսյանի խոսքով էլ` մեր պայքարը պետք շարունակենք, բայց պատրանք չպետք է տածենք , որ այն միջազգայնորեն սկուտեղի վրա մեզ կմատուցեն: Ըստ նրա՝ միջազգային արդարությունը ժամանակակից աշխարհում էապես հիմնված է ներքին արդարության վրա։
Նշենք, որ համաժողովի ավարտին հայկական պատվիրակության անդամները Ցեղասպանության վերաբերյալ տեղեկատվական նյութեր են բաժանել մասնակիցներին. «Հայոց ցեղասպանության 100-րդ տարելիցի խորհրդանիշեր անմոռուկներ ենք բաժանել ԵԺԿ անդամ կուսակցությունների ներկայացուցիչներին»,- ասաց Արմեն Աշոտյանը։ Նա նշեց, որ եվրոպացի գործընկերներին բացատրել է, թե ինչ է խորհրդանշում Հայոց ցեղասպանության խորհրդանիշ անմոռուկը և ինչ բարոյական քայլ կլինի նրանց կողմից այդ խորհրդանիշի կիրառումը:
Արմեն Աշոտյան, Մհեր Շահգելդյան, Րաֆֆի Հովհաննիսյան
