Հասարակություն

Սուրբ ծննդյան տոնը վիրահայ համայնքի ամենասիրած տոներից է

Գիտա Էլիբեկյան
Ռադիոլուր- Թբիլիսի

Այսօր Սուրբ Ծննդյան պատարագ է մատուցվել նաև Թբիլիսիի Սուրբ Էջմիածին եկեղեցում: Վիրահայոց թեմի առաջնորդ Վազգեն եպիսկոպոս Միրզախանյանի հանդիսապետությամբ կատարվել է նաև ջրօրհներք. հայ համայնքի ներկայացուցիչները օրհնված հրաշագործ ջուրը տարել են` ի բժշկություն հոգևոր ու մարմնավոր ախտերի: Արարողությանը ներկա են եղել և հայ համայնքին շնորհավորել են նաև Վրաստանի կառավարության ներկայացուցիչները: Վիրահայությանը շնորհավորական ուղերձ է հղել նաև երկրի նախագահ Գեորգի Մարգվելաշվիլին և վարչապետ Իրակլի Ղարիբաշվիլին:

 

Հավլաբարում  գտնվող Սուրբ Էջմիածին եկեղեցին այսօր առավել մարդաշատ էր:  Սուրբ ծննդյան տոնը վիրահայ համայնքի ամենասիրած տոներից է:

Վիրահայոց  թեմի առաջնորդ Վազգեն եպիսկոպոս Միրզախանյանը տոնի առիթով շնորհավորելով եկեղեցում հավաքված բազմությանը, մաղթեց  «շարունակել խաղաղ ու համերաշխ լինել, պահպանել  հազարամյակներով մեր եղբայրությունը»:

Վրաստանի համերաշխության և քաղաքացիական հավասարության հարցերով նախարար Պաատա Զաքարեիշվիլին նշեց, որ սա ընդհանուր տոն է.  «և  ես միանում եմ այս ուրախությանը և հպարտանում, որ  հայերը դարեր շարունակ  ապրելով այստեղ, նշում են իրենց տոները և հավատում,որ  դա կշարունակեն անել հետագա դարերի ընթացքում … »:

Վիրահայ  բանաստեղծուհի Անահիտ Բոստանջյանը մաղթեց բոլորին .  «աշխարհին, հայ ժողովրդին, ապրել Քրիստոսի պատվիրաններով, խիղճը մաքուր պահել, մերձավորին աչք չդնել: Այս դեպքում աշխարհը կանգուն կլինի ու ավելի շիտակ ճանապարհով կկգնա: Թող  խինդն այսօրվա հարատևի միշտ , հավերժանա այս երկրի տակ, լինելով ողջ տարվա ուղենիշը»:

Back to top button