Փաստաբանների պալատի նախագահ Արա Զոհրաբյանն այսօր ամփոփել է 2014-ի արդյունքներն ու հաշվետվություն ներկայացրել ոչ միայն կառույցի մեկամյա գործունեության , այլ նաև իր նախընտրական ծրագրի կատարման վերաբերյալ: Արա Զոհրաբյանը խոսել է Փաստաբանների պալատի գրեթե բոլոր նախաձեռնությունների մասին: Հարցին, թե որքանով է հաջողվել բարձրացնել փաստաբանի հեղինակությունը, նախընտրել է վերջնական պատասխաններ չտա ու շեշտել, որ 2015-ի հիմնական խնդիրը լինելու է ինքնամաքրումը կամ կոռուպցիոն ռիսկերի մեջ ներգրավված փաստաբաններից ազատվելը:
Ամփոփելով տարին ՝ փաստաբանների պալատի նախագահ Արա Զոհրաբյանը իր ասելիքի հիմնական մասը նվիրեց կառույցի ներսում կատարված բարեփոխումներին: Մանրամասն թվարկեց դրանք, անդրադարձավ գրեթե բոլոր միջոցառումներին:
Նախորդ տարվա ընթացքում պալատի հիմնական խնդիրներից մեկը եղել է հանրային պաշտպանի ինստիտուտի կայացումը: Յուրաքանչյուր ոք իրավաբանական օգնություն ստանալու իրավունք ունի, իսկ որոշակի դեպքերում ՝ այդ օգնությունը տրվում է անվճար՝ պետական միջոցների հաշվին, հանրային պաշտպանի գրասենյակի միջոցով:
«Մեր երկրում կա այն հգոգեվիճակը, որ ինչը անվճար է, ապա անորակ է: Մենք ցանկանում ենք կոտրել այդ կարծրատիպը»:
Գրասենյակում աշխատող հանրային պաշտպաններն այսուհետ ընտրվելու են մրցութային կարգով , իսկ նրանց աշխատանքը վերահսկելու է նորաստեղծ մոնիթորինգի բաժինը::
Փաստաբանների պալատի նախագահը կարևորւմ է նաև փաստաբանական դպրոցի գործունեությունը, նշում է, որ որակական փոփոխությունների է ենթարկվել ուսումնական գործընթացը, ներդրվել է նոր՝ ըստ մասնագիտացումների մոդել, ներդրվել է հեռավար ուսուցման ծրագիրը:
Պալատն ակտիվացրել է միջազգային կապերը, մարզային քաղաքականությունը, տարվա ընթացքում մի քանի թիրախային փաստաբանական ծրագիր է իրականացրել ՝ օրինակ «Իրավական աջակցություն սիրիահայերին» կամ «Իրազեկ բանակ » ծրագիրը, անգամ երիտասարդական խորհուրդ է ձևավորել: Մի խոսքով ՝ ակտիվ գործունեություն է ծավալել, որը Արա Զոհրաբյանին թույլ է տալիս հետևյալն ակնկալել.
«Եթե պալատի նոր նախագահ գա ու փորձի այս սանդղակից ցածր բան անել, փաստաբանական համայնքը ուղղակի դուրս մղի իերն համայքնից»:
2014-ի ընթացքում 3 փաստաբանի արտոնագրի գործողություն դադարեցվել է, փաստաբանների նկատմամբ 144 կարգապահական վարույթ է հարուցվել՝ նախորդ տարվա 96-ի դիմաց: Փաստաբանների նկատմամբ բողոքների թիվը նույնպես աճել է. 2013-ին ցուցանիշը եղել է 63, այս տարի ՝ 173:
Տարվա ընթացքում դատական մի քանի գործերի քննության ժամանակ փաստաբաններն ագրեսիվ վերաբերմունքի արժանացան: Խոսքն, օրինակ, այն միջադեպերի մասին է, որոնք գրանցվեցին Լյուքս Ստեփանյանի, Վարդան Պետրոսյանի դատաքննությունների ժամանակ: Վերլուծելով դրանք՝ Արա Զոհրաբյանն ասում է , որ այդ վերաբերմունքը նորություն չէ, որ նման դեպքերում պալատը մի կողմից փորձում է պաշտպանել փաստաբանների իրավունքները, մյուս կողմից՝ չմիջամտել նրանց գործունեությանը: Օրինակ Վարդան Պետորսայնի գործով երկու փաստաբանների նկատմամբ էլ կարգապահական վարույթ է հարուցվել, բայց երկու դեպքում էլ դրանք հարուցվել են դատարանից դուրս գործողությունների ՝ այս դեպքում մամուլում արված հրապարակային դատողությունների համար: Փաստաբանների նկատմամբ ագրեսիվ վերաբերմունքը չկանխելու մեջ, ըստ Զոհրաբյանի, դեր ունի նաև դատարանը, բայց՝ ոչ միայն:
«Մեր թիրախը այս դեպքում դատարանն է, բայց դեր ունի նաև իրավագիտակցությունը, որովհետև փաստաբաններին միշտ նույնացնում են իրենց վստահորդների հետ»:
Ինչ վերաբերում է փաստաբան- դատավոր – դատախազ հարբերություններին. այս դաշտում ամեն ինչ հարթ չէ, բայց նույնքան սուր էլ չէ, որքան նախորդ տարիներին էր, երբ փաստաբանները որպես բողոքի միջոց դատադուլի էին դիմում: Վճռաբեկ դատարանի հետ փոխհարաբերություններում ընդհանուր հայտարարներ առայժմ չկան , բայց Փաստաբանների պալատում կարծում են, որ մինչև մյուսներին մեղադրելը, պետք է սկսեն իրենցից:
«Մենք պրոբլեմը փորձում ենք տեսնել մեր մեջ: Մենք նախ ասում ենք՝ փաստաբան, դո չպետք է լինես միջոնրդ, որովհետև եթե միջնորդ ես, ուրեմն կախման մեջ ես դատախազից ու դատավորից: Ինքնամաքրման ճանապարհից հետո մենք խնդիրը տեսնում ենք դատարանի մեջ»:
Ի դեպ, ինքնամաքրումը լինելու է պալատի առաջնային խնդիրը նաև 2015-ի ընթացքում: Փորձելու ենք բացահայտել կոռուպցիոն ռիսկերի մեջ ներգրավված փաստանբաններին ու ազատվել նրանցից ՝ ասաց Արա Զոհրաբյանը:
