Դոնալդ Թրամփի հարկադրական դիվանագիտությունը Իրանի հարցում բախվել է դիմադրության պատին, ինչը կարող է տապալել պատերազմն ավարտելու նրա ջանքերը։ Փորձագետները նշում են, որ Թրամփի անկայուն հռետորաբանությունը և արագ գործարքների ձգտումը հակասում են իրանական բանակցային ոճին՝ վտանգելով ողջամիտ համաձայնության հնարավորությունը, գրում է Reuters-ն իր վերլուծական հոդվածում։
Ընդգծվում է, որ կողմերի բանակցային տեմպերի տարբերությունը բարդացնում է իրավիճակը։ ԱՄՆ նախագահը ձգտում է արագ գործարքի, մինչդեռ իրանական կողմը երկարաձգում է բանակցությունները։
Իրանի ղեկավարության համար ընդունելի չեն կապիտուլյացիային հավասարազոր պայմանները։
Իսկ Թրամփը պահանջում է հակամարտության այնպիսի ավարտ, որը կընկալվի որպես ԱՄՆ բացարձակ հաղթանակ, ինչին Թեհրանը հրաժարվում է գնալ։
Ըստ Reuters-ի՝ Թրամփի ամենախիստ հայտարարություններից մի քանիսը, որոնք հաճախ հնչում են նրա Truth Social հարթակում կեսգիշերից հետո, արվել են բեկումնային պահերին։
«Երկուշաբթի օրը Թրամփը մերժեց իրանցի պաշտոնյաների խաղաղության վերջին առաջարկը՝ այն անվանելով «աղբ»։ «Նախագահի հռետորաբանության մեջ ռազմավարական համբերության պակասն ու անհետևողականությունը թուլացնում են նրա ուղերձները»,— ասել է Դեմոկրատական և Հանրապետական վարչակազմերի Մերձավոր Արևելքի հարցերով նախկին ավագ խորհրդական Դենիս Ռոսը։
Պեկին կատարած այցի ընթացքում Թրամփը հիմնականում զերծ մնաց Իրանի հասցեին կոշտ բանավոր հարձակումներից, քանի որ կենտրոնացած էր Չինաստանի հետ կարևոր հարաբերությունների վրա, որը Թեհրանի դաշնակիցն ու նավթի գնորդն է։ Սակայն որոշ վերլուծաբաններ կարծում են, որ եթե Թրամփը, որը հաճախ է հրապարակայնորեն հանդես գալիս և լրագրողներին հեռախոսային հանպատրաստից հարցազրույցներ տալիս, իսկապես մտադիր է ելք գտնել այս հակամարտությունից, ապա նրա համար լավագույն տարբերակը կլինի ընդմիշտ մեղմացնել իր հռետորաբանությունը»,-գրում է Reuters-ը։
