Տուապսեում այրվում է նավթավերամշակման գործարանը, դպրոցները փակվել են

Տուապսեում, որտեղ ուկրաինական ԱԹՍ-ների հարվածների հետեւանքով այրվում է նավթավերամշակման գործարանը, դպրոցներն «անվտանգության նկատառումներով» փակվել են։

Կրասնոդարի երկրամասի օպերատիվ շտաբը հայտարարել է, որ քաղաքի 11 դպրոցներ արդեն դադարել են աշակերտներ ընդունել։

Մանկապարտեզները աշխատում են հերթապահ խմբերի ռեժիմով այն ծնողների համար, որոնք աշխատում են եւ երեխաներին թողնելու տեղ չունեն։ Փակվել են նավթավերամշակման գործարանի մոտ գտնվող երկու մանկապարտեզները։

Ավելի վաղ՝ դպրոցները փակելու պահանջով հանդես էին եկել քաղաքի շատ բնակիչներ։ Ուկրաինական ԱԹՍ- ների հարվածների հետեւանքով այրվող նավթավերամշակման գործարանը վատթարացել է էկոլոգիական վիճակը։

Երեքշաբթի օրը վնասված պահեստարաններից վառելիքը լցվել է մոտակա բնակելի փողոց եւ այրվելով հոսել՝ վնասելով կայանած ավտոմեքենաները։

Հրդեհի պատճառով իշխանությունները խորհուրդ են տվել բնակիչներին առանց անհրաժեշտության փողոց դուրս չգալ, իսկ անհրաժեշտության դեպքում կրել դիմակներ։

Ապրիլի 23-ին քաղաքում հրդեհի հետեւանքով մթնոլորտում կուտակված նավթամթերքների կոնդենսատի հետեւանքով տեղացել էր մրոտ «սեւ անձրեւ»։