ԱՄՆ փոխնախագահ Ջեյ Դի Վենսը եւ Իսրայելի վարչապետ Բենիամին Նեթանյահուն Իրանի հետ խաղաղ համաձայնագրի պայմաններն են քննարկել հեռախոսազրույցի ընթացքում, X սոցիալական ցանցում հայտնել է Axios-ի լրագրող Բարաք Ռավիդը՝ հղում անելով անանուն աղբյուրի։
Ավելի ուշ տեսաուղերձում Իսրայելի վարչապետը նշել է, որ Իրանի Իսլամական Հանրապետության հետ բանակցությունները քննարկել է նաեւ ԱՄՆ նախագահ Դոնալդ Թրամփի հետ։ Վերջինս առաջարկել է «օգտագործել» Իրանի դեմ իրականացված ռազմական գործողության արդյունքները՝ հրադադարի հասնելու համար։
Իր հերթին CBS News-ը, վկայակոչելով Իրանի ԱԳՆ ներկայացուցչին, հայտնում է, որ Թեհրանն ԱՄՆ-ից ստացել է հաղորդագրություններ, որոնք կարող են բանակցությունների հիմք դառնալ։
«Մենք միջնորդների միջոցով ստացել ենք ԱՄՆ-ի դիտարկումները եւ դրանք ուսումնասիրում ենք»,- ասել է պաշտոնյան։
ԱՄՆ-ը մտադիր է Իրանի հետ բանակցություններն ավարտել մինչեւ ապրիլի 9-ը։ Սա էլ հաղորդում է Ynet-ը՝ հղում անելով իր աղբյուրին։
Ամերիկյան կողմն այդ օրը բնութագրել է որպես «պատերազմի ավարտի օր», նշել է զրուցակիցը՝ հավելելով, որ մինչ այդ մնում է 21 օր, որը կօգտագործվի «պատերազմի եւ բանակցությունների» համար։
Աղբյուրը պնդում է, որ ժամկետի ընտրությունը կապված է ԱՄՆ նախագահ Դոնալդ Թրամփի՝ Իսրայելի Անկախության օրվա (ապրիլի 21–22) տոնակատարությանը մասնակցելու ծրագրերի հետ։ Այնտեղ Թրամփը պետք է ստանա երկրի բարձրագույն պետական պարգեւը։
Ու այս ֆոնին The New York Times-ն է գրում, որ Պենտագոնը շարունակում է քննարկել Մերձավոր Արեւելք օդադեսանտային ուժեր ուղարկելու հարցը։ Խոսքը մոտ 3 հազար զինծառայողի մասին է։
CBS News-ը հայտնում է, որ արդեն տարածաշրջան են ուղարկվում 2,5 հազար ծովային հետեւակայիններ։
Այս ուժերը կարող են օգտագործվել Խարկ կղզին գրավելու համար, որի միջոցով Իրանն արտահանում է իր նավթի մոտ 90 տոկոսը։
