Լուսինե Վասիլյան
«Ռադիոլուր»
Մեր բոլոր ջանքերը բախվում են թուրքական անհանդուրժողականությանը և ամբարտավանությանը՝ այսօր խորհրդարանում ասել է Կիպրոսի Հանրապետության Ներկայացուցիչների պալատի նախագահ Յանակիս Օմիրուն: Նրա գլխավորած պատվիրակությանն այսօր հյուրընկալել են խորհրդարանում: Ներկայացուցիչների պալատի նախագահը ելույթ է ունեցել արտահերթ նիստի ժամանակ: Նա անդրադարձել է հայ- կիպրական հարաբերություններին, երկու ժողովուրդների երկարամյա բարեկամությանը, խոսել է նաև Թուրքիայի հետ երկու երկրների հարաբերությունների ընդհանրությունների մասին:
Արդեն քառասուն տարի Թուրքիան օկուպացված է պահում Կիպրոսի Հանրապետության տարածքի մեծ մասը՝ խախտելով միջազգային իրավունքի նորմերն ու առաջադրելով պայմաններ, որոնք տանում են «երկու պետության» սկզբունքին՝ ասաց Կիպրոսի Հանրապետության Ներկայացուցիչների պալատի նախագահը:
«Նման պայմաններում Կիպրոսը ստիպված էր կասեցնել հիմնախնդրի շուրջ բանակցություններում իր մասնակցությունը եւ հայտարարել Թուրքիայի դեմ քաղաքական եւ իրավական քայլերի ձեռնարկման մասին»:
Իսկ ելույթը Յանակիս Օմիրուն ամփոփեց հետևյալ դիտարկումով. Կիպրոսը եւ Հայաստանը պետք է ակտիվացնեն երկկողմ հարաբերությունները, միավորեն միջազգային կազմակերպություններում իրենց ջանքերը եւ օգտագործեն կիպրական ու հայկական սփյուռքի լծակները որոշումներ կայացնող ատյաններում՝ ընդհանուր ճակատ ձեւավորելով ընդդեմ Թուրքիայի քաղաքականության:
