Կոռուպցիայի ընկալման համաթիվը Հայաստանում 2025 թվականին 2024-ի համեմատ մեկ միավորով իջել է՝ կազմելով 46 միավոր։
Թրանսփարենսի Ինթերնեշնլը այսօր հրապարակել է աշխարհում կոռուպցիայի ընկալման համաթիվը։
Հայաստանի համաթիվը «բավականին համեստ ցուցանիշ է, որը նաեւ ցույց է տալիս, որ հակակոռուպցիոն բարեփոխումները դեռեւս չեն տալիս գործարարների եւ փորձագետների ակնկալած արդյունքները, որոնց ընկալումները չափում է ԿԸՀ-ն»,- նշված է Թրանսփարենսի Ինթերնեշնլի հաղորդագրության մեջ։
Հայաստանը ներառված է Արեւելյան Եվրոպա- Կենտրոնական Ասիա տարածաշրջանում։ Այստեղ Հայաստանը իր 46 համաթվով զիջում է միայն Վրաստանին (50)։
Հայաստանում ԿԸՀ-ն ավելի բարձր է համաշխարհային միջին արժեքից։
Կոռուպցիայի ընկալման համաթիվը Հայաստանում ավելի բարվոք է, քան հարեւաններին։ Թուրքիայում այն կազմում է 31, Իրանում՝ 23, Ադրբեջանում՝ 30, Ռուսաստանում՝ 22։
ԿԸՀ սանդղակը ձգվում է 0- ից 100։ 0-ն բացարձակ կոռումպացված, 100-ը՝ բացարձակ մաքուր երկրներն են։ Որքան բարձր է համաթիվը, այդքան երկիրը քիչ կոռումպացված է համարվում։
Ըստ համաշխարհային զեկույցի՝ կոռուպցիայից մաքուր երկրների եռյակը սկանդինավյան երկրներն են՝ Դանիան (89), Ֆինլանդիան (88), Նորվեգիան (81)։
Թրանսփարենսի Ինթերնեշնլն իր զեկույցում նշել է, որ 2025թ Կոռուպցիայի ընկալման համաթիվը ցույց է տալիս, որ «թույլ ինստիտուտները եւ ժողովրդավարական հետընթացն Արեւելյան Եվրոպայում եւ Կենտրոնական Ասիայում խթանում են կոռուպցիան եւ նեղացնում քաղաքացիական տարածքը»։
