Իսրայելի իշխանությունները զգուշացրել են ԱՄՆ-ին, որ անհրաժեշտության դեպքում, առանց Վաշինգտոնի մասնակցության կարող են հարվածել Իրանին, գրել է իսրայելական The Jerusalem Post թերթը՝ հղում անելով աղբյուրներին:
Ըստ թերթի՝ Իսրայելի պաշտպանության նախարարության ներկայացուցիչներն անցյալ շաբաթ այս տեղեկատվությունը փոխանցել են Պենտագոնի պաշտոնյաներին :
Իսրայելը Վաշինգտոնին ներկայացրել է Իրանին հարվածելու ծրագրեր։ «Մենք ամերիկացիներին ասել ենք, որ միակողմանիորեն կհարվածենք, եթե Իրանը հատի բալիստիկ հրթիռների հարցում մեր կողմից սահմանված կարմիր գիծը», — թերթին ասել է Իսրայելի ռազմաքաղաքական ղեկավարության աղբյուրը: Նա նշել է, որ Իսրայելը շարունակում է հետևել իրավիճակին: Հրեական պետության ներկայացուցիչները Վաշինգտոնի հետ իրենց երկխոսության մեջ ընդգծել են, որ պահպանում են Իրանի նկատմամբ գործողությունների ազատությունը:
Միևնույն ժամանակ, ինչպես նշում է թերթը, Իսրայելի իշխանությունները վախենում են, որ նույնիսկ եթե ԱՄՆ-ն որոշի հարվածել Իրանին, դրանք կլինեն սահմանափակ և խորհրդանշական, ինչը հակասում է Իսրայելի ներկայիս կառավարության դիրքորոշմանը:
Փետրվարի 6-ին Օմանի մայրաքաղաքում տեղի է ունեցել Իրանի և ԱՄՆ-ի միջև իրանական միջուկային ծրագրի շուրջ ստեղծված ճգնաժամի կարգավորման վերաբերյալ բանակցությունների նոր փուլ: Իրանի պատվիրակությունը գլխավորում էր արտգործնախարար Աբբաս Արաղչին, իսկ ԱՄՆ պատվիրակությունը՝ նախագահի հատուկ դեսպանորդ Սթիվեն Ուիթքոֆը: Օմանի արտգործնախարար Բադր ալ-Բուսաիդիի խոսքով՝ Թեհրանի և Վաշինգտոնի պատվիրակությունները Մասկատում շատ լուրջ խորհրդակցություններ են անցկացրել Իրանի միջուկային ծրագրի վերաբերյալ և մտադիր են շարունակել երկխոսությունը:
