Ուկրաինայի նախագահ Վոլոդիմիր Զելենսկին Գերագույն գլխավոր հրամանատարի շտաբի նիստի ժամանակ հայտարարել է, որ ռուսական զորքերը փորձում են շրջանցել ուկրաինական անօդաչու թռչող սարքերի պաշտպանական դիրքերը հարևան Բելառուսի տարածքով։
«Սա ռիսկային է Բելառուսի համար։ Մենք տեսնում ենք քայլեր «Օրեշնիկ» հրթիռային կայանքի հետ կապված, և հիմա՝ «շահիդների» օգնությամբ։ Ամոթ է, որ Բելառուսը զիջում է իր ինքնիշխանությունը Ռուսաստանի ագրեսիվ նկրտումներին»,-Telegram-ում հայտարարել է Ուկրաինայի նախագահը։
Զելենսկին նաև նշել է, որ ռուսները տեսնում են Ուկրաինայի ՀՕՊ գծերը, մասնավորապես՝ անօդաչու թռչող սարքերը, և փորձում են շրջանցել դրանք։ Ուկրաինական հետախուզության տվյալներով՝ Ուկրաինայի դեմ հարվածների համար օգտագործվող սարքավորումները տեղակայվում են «այդ թվում՝ սահմանի մոտ գտնվող բելառուսական բնակավայրերի բնակելի շենքերի վրա»։
«Իրականում, ալեհավաքները և այլ սարքավորումները տեղակայված են սովորական հինգհարկանի շենքերի տանիքներին, որոնք օգնում են «շահիդներին» ուղղորդել դեպի մեր արևմտյան շրջաններում գտնվող թիրախները», — գրել է Ուկրաինայի նախագահը։
Զելենսկու խոսքով՝ այս «լուրջ հարցի» պատասխանը կտրվի Գերագույն գլխավոր հրամանատարի շտաբի հաջորդ նիստում։
