Ով, երբ, ինչքան ու ինչպես կվճարի առողջության պարտադիր ապահովագրման հովանոցի տակ կանգնելու համար

2026 թվականի առաջին օրը Հայաստանի քաղաքացիները կարթնանան ապահովագրված։ Երկար տարիներ քննարկված ու մի քանի անգամ հետաձգված «Առողջության համապարփակ ապահովագրության մասին» օրենքը 2026-ի առաջին նվերն է կառավարությունից Հայաստանի շուրջ մեկուկես միլիոն բնակիչներին։

Եթե բացենք սպասված նվերի տուփը, կտեսնենք, որ դրա համար տարեկան վճարելու ենք 129 600 դրամ։ Համակարգի ներդրման առաջին փուլում՝ 2026-ին, կառավարությունը մեր փոխարեն կվճարի ամբողջ գումարը կամ դրա մեծ մասը։  

Հունվարի 1-ից առաջնահերթորեն կապահովագրվեն մինչև 18 տարեկան երեխաները, հաշմանդամության 1-ից 3-րդ խումբ ունեցող անձինք, սոցիալական  անապահովության 28 բալ և ավելի ունեցող անձինք, զոհված զինծառայողների ընտանիքները և 65 տարեկանից բարձր անձինք։ Այս խմբերի ապահովագրության գումարն ամբողջությամբ կվճարի պետությունը։

2026-ի հունվարի մեկից ապահովագրության պարտադիր համակարգ կներառվեն նաև 2025 թվականի նոյեմբերի դրությամբ 200 հազար մեկ դրամից բարձր աշխատավարձ ստացող քաղաքացիները։ Նրանց համար ևս 2026-ին պետությունը կվճարի գումարի մեծ մասը։