Դեմոկրատ կոնգրեսականները հրապարակել են Էփշտեյնի գործից նոր նյութեր

Սեռական շահագործման մեջ դատապարտված եւ մանկապղծության մեջ մեղադրվող ֆինանսիստ Ջեֆրի Էփշտեյնի գործի հետաքննության շրջանակում ԱՄՆ Ներկայացուցիչների պալատի վերահսկողական հանձնաժողովի դեմոկրատ անդամների հրապարակած փաստաթղթերի և լուսանկարների մեջ կան Ուկրաինայի, Ռուսաստանի և Չեխիայի քաղաքացիների անձնագրերի լուսանկարներ, հայտնում է Axios-ը։

Անձնագրերից բացի՝ հրապարակված հարյուրավոր նյութերի թվում կան լուսանկարներ, այդ թվում կանացի մարմնի վրա Վլադիմիր Նաբոկովի «Լոլիտա» վեպից ձեռագրով արված մեջբերումներ։ 20-րդ դարի գրականության մեջ ամենանշանակալի վեպերից մեկում կա նաեւ մանկահասակ աղջկա եւ հասուն տղամարդու միջեւ սեռական կապի պատմություն։

Հրապարակված են նաեւ լուսանկարներ, որտեղ Էփշտեյնը հանրային հայտնի դեմքերի, այդ թվում՝ Դոնալդ Թրամփի և Microsoft-ի հիմնադիր Բիլ Գեյթսի հետ է պատկերված։

Միաժամանակ, ինչպես նշում է Axios-ը, այդ լուսանկարներից ոչ մեկը չի պարունակում պատկերված անձանց կողմից հանցագործությունների կատարման ուղիղ ապացույցներ և չի ցուցադրում ակնհայտ բռնություն։

Հանձնաժողովի անդամները հայտնել են, որ շարունակում են նյութերը հրապարակել «թափանցիկության ապահովման նպատակով»։