ԿԳՄՍ նախարարության աջակցությամբ Երևանի մնջախաղի պետական թատրոնը Գերմանիայի Շտուտգարտ քաղաքում մասնակցել է «Հայ մշակույթի օրեր Շտուտգարտում» փառատոնին։ Թատրոնը ներկայացրել է ռեժիսոր Ռիմա Պիպոյանի բեմադրած երկու աշխատանք՝ «Ոսկոր» և «Խալի» պարային ներկայացումները։
Ներկայացումները համադրել են հայկական մշակութային ժառանգությունն ու ժամանակակից արտահայտչական ձևերը՝ ստեղծելով ժամանակակից հայկական պարի յուրօրինակ դիմագիծ։ Հայկական գորգագործության խորհրդաբանության վրա հիմնված «Խալի» բեմականացումը գույների, հիշողության և պատմության համադրություն է։
«Ոսկոր» ներկայացումը գոյության, հիշողության և վերածննդի գաղափարներն է մարմնավորում․ այն հաջողությամբ ցուցադրվել է նաև Պորտուգալիայում՝ Ալմադայի միջազգային պարային փառատոնի շրջանակում։
Շտուտգարտում անցկացված փառատոնում Երևանի մնջախաղի պետական թատրոնի ներկայացրած բեմադրություններն արժանացել են հանդիսատեսի ջերմ ընդունելությանը։
