Մեծ Բրիտանիան չեղարկել է Սիրիայի ժամանակավոր նախագահ Ահմեդ ալ-Շարաայի և ներքին գործերի նախարար Անաս Խաթթաբի դեմ պատժամիջոցները: Այս մասին ասված է Մեծ Բրիտանիայի ֆինանսների նախարարության նոյեմբերի 7-ին հրապարակած փաստաթղթում: ՄԱԿ-ի Անվտանգության խորհուրդը նմանատիպ որոշում էր ընդունել նախորդ օրը:
Նրանք երկուսն էլ նախկինում «Իսլամական պետության» (ԻՊ) և «Ալ-Քաիդայի» դեմ սահմանված ֆինանսական սահմանափակումների տակ էին: «Հայաթ Թահրիր ալ-Շամ» (ՀԹՇ) կազմակերպությունը, որը իշխանության է եկել Սիրիայում 2024 թվականի դեկտեմբերին, Մեծ Բրիտանիան հոկտեմբերին հանել է ահաբեկչական կազմակերպությունների ցանկից:
Ռոյթերսի տվյալներով՝ Եվրամիությունը նույնպես պատրաստվում է վերացնել ալ-Շարաայի դեմ սահմանափակումները: «Շարունակում ենք աջակցել խաղաղ և ներառական անցումային փուլին, որն իրականացվում է սիրիացիների գլխավորությամբ և նրանց անմիջական մասնակցությամբ, բոլոր սիրիացիների համար ավելի լավ ապագա կառուցելու համար», — ասել է Եվրոպական հանձնաժողովի խոսնակը:
Նոյեմբերի 6-ին ՄԱԿ-ի Անվտանգության խորհուրդը բանաձև է ընդունել, որով անցումային ժամանակահատվածում վերացվում են Սիրիայի առաջնորդի, ինչպես նաև Սիրիայի ներքին գործերի նախարարության ներկայիս ղեկավարի դեմ պատժամիջոցները: Անվտանգության խորհրդի 15 անդամներից տասնչորսը քվեարկել են Միացյալ Նահանգների կողմից պատրաստված փաստաթղթի օգտին։ Չինաստանը ձեռնպահ է մնացել։ Բանաձևի տեքստում ընդգծվում է «Սիրիայի Արաբական Հանրապետության ինքնիշխանության, անկախության, տարածքային ամբողջականության և ազգային միասնության լիակատար հարգանքի նկատմամբ հանձնառությունը»։
Այս միջոցները ձեռնարկվում են Ահմեդ ալ-Շարաայի և ԱՄՆ նախագահ Դոնալդ Թրամփի հանդիպումից առաջ, որը նախատեսված է նոյեմբերի 10-ին Սպիտակ տանը։
Հանդիպման ժամանակ նախատեսվում է ստորագրել համաձայնագիր, որով Սիրիան կմիանա «Իսլամական պետության» դեմ պայքարող ԱՄՆ-ի գլխավորած կոալիցիային։
2024 թվականի վերջին Բաշար ալ-Ասադին տապալած ալ-Շարաան նախկինում հայտնի էր որպես Աբու Մոհամմեդ ալ-Ջուլանի։ Այս անվամբ նա 2003 թվականին միացել էր Իրաքում գտնվող «Ալ-Քաիդային»՝ ԱՄՆ գլխավորած միջազգային կոալիցիայի դեմ պայքարելու համար։ 2006 թվականին նա ձերբակալվել էր ԱՄՆ զինվորականների կողմից և հինգ տարի անցկացրել իրաքյան բանտերում։
2011 թվականին ազատ արձակվելուց հետո նա հիմնադրել և ղեկավարել է «Ջաբհաթ ալ-Նուսրան»՝ «Ալ-Քաիդայի» սիրիական մասնաճյուղը։ Որոշ ժամանակ շարժումը համագործակցել է «Իսլամական պետության» հետ։ 2017 թվականին «Ջաբհաթ ալ-Նուսրան» վերափոխվել է «Հայաթ Թահրիր ալ-Շամ»-ի։ Նոր խմբավորման հիմնական նպատակը Ասադին տապալելն էր։
