Ուկրաինայի նախագահ Վոլոդիմիր Զելենսկու հայտարարությունները պատերազմի հնարավոր ավարտի մասին մեծ քայլ են դեպի «դիվանագիտական լուծում»,-CNN-ին ասել է Ռուսաստանի նախագահի արտասահմանյան երկրների հետ ներդրումների և տնտեսական համագործակցության հարցերով հատուկ ներկայացուցիչ և Ռուսաստանի ուղղակի ներդրումների հիմնադրամի (RDIF) ղեկավար Կիրիլ Դմիտրիևը՝ ԱՄՆ կատարած այցի ժամանակ։
«Ես կարծում եմ, որ Ռուսաստանը, Միացյալ Նահանգները և Ուկրաինան իսկապես բավականին մոտ են դիվանագիտական լուծմանը։ Նախագահ Զելենսկին մեծ քայլ է արել՝ արդեն իսկ ընդունելով, որ խոսքը գնում է առաջնագծի մասին»,-ասել է Դմիտրիևը CNN-ի հաղորդավար Ջեյք Թափերի հետ հարցազրույցում։
Ռուսաստանի ներկայացուցիչը հավելել է, որ Ուկրաինայի առաջնորդը նախկինում պահանջել էր ռուսական զորքերի լիակատար դուրսբերում իր տարածքից։
«Այսպիսով, ըստ էության, կարծում եմ, որ մենք բավականին մոտ ենք դիվանագիտական լուծմանը, որը կարող է մշակվել»,-բացատրել է Դմիտրիևը։
Նա կրկնել է Մոսկվայի հայտարարությունները «անվտանգության երաշխիքների» և Կրեմլի դիրքորոշումը Ուկրաինայում ռազմական գործողությունների շարունակման վերաբերյալ հասկանալու «կարևորության» մասին։
Դմիտրիև. Պուտինի և Թրամփի հանդիպումը կկայանա, սակայն պարզ չէ թե երբ
Պաշտոնյան նաև պատասխանել է լրագրողի հարցին՝ ԱՄՆ նախագահ Դոնալդ Թրամփի՝ Բուդապեշտում իր ռուս գործընկեր Վլադիմիր Պուտինի հետ նախկինում հայտարարված հանդիպումը չեղարկելու որոշման մասին:
Դմիտրիևի խոսքով՝ երկու առաջնորդների միջև հանդիպումը կկայանա, բայց «հավանաբար ավելի ուշ»։
Ինքը՝ Թրամփը, հայտարարելով Պուտինի հետ առաջիկա հանդիպումը չեղարկելու մասին, նաև ընդգծել է, որ գագաթնաժողովը կկայանա «ապագայում»: Ըստ Դմիտրիևի՝ Վաշինգտոնը և Մոսկվան քննարկում են հետագա գերիների փոխանակման հնարավորությունը:
ԱՄՆ կատարած այցի ընթացքում Դմիտրիևը կհանդիպի Թրամփի հատուկ ներկայացուցիչ Սթիվեն Ուիթքոֆի հետ՝ «ԱՄՆ-Ռուսաստան հարաբերությունների քննարկումը շարունակելու համար»:
Նրա այցը նախատեսված էր Բուդապեշտի գագաթնաժողովի չեղարկումից և Թրամփի՝ «Լուկոյլի» և «Ռոսնեֆտի» դեմ պատժամիջոցներ կիրառելու որոշումից առաջ:
