Միացյալ Նահանգները, Թուրքիան, Կատարը և Եգիպտոսը կարծում են, որ Մերձավոր Արևելքում հետագա տարաձայնությունները պետք է լուծվեն բացառապես դիվանագիտական միջոցներով։ Այս մասին ասվում է հռչակագրի տեքստում, որը հրապարակվել է հոկտեմբերի 13-ին Սպիտակ տան կայքում։
Փաստաթղթում նշվում է, որ այն ստորագրած պետությունները «պարտավոր են լուծել ապագա վեճերը դիվանագիտական միջամտության և բանակցությունների, այլ ոչ թե ուժի կամ երկարատև հակամարտության միջոցով»։ «Մենք գիտակցում ենք, որ Մերձավոր Արևելքը չի կարող դիմանալ երկարատև պատերազմների, փակուղի մտնող բանակցությունների կամ ձեռք բերված համաձայնությունների մասնակի, թերի կամ ընտրովի իրականացման անվերջանալի շրջափուլին», — նշվում է հռչակագրում։
Հոկտեմբերի 13-ին Շարմ էլ Շեյխում տեղի է ունեցել խաղաղության գագաթնաժողով, որը հրավիրվել էր Գազայի հատվածում հրադադարի և այնտեղ պահվող բոլոր իսրայելցի պատանդների ազատ արձակման կապակցությամբ։ Հանդիպման ընթացքում Եգիպտոսի նախագահ Աբդել Ֆաթթահ աս-Սիսին, Կատարի էմիր շեյխ Թամիմ բին Համադ ալ Թանին, ԱՄՆ նախագահ Դոնալդ Թրամփը և Թուրքիայի նախագահ Ռեջեփ Թայիփ Էրդողանը ստորագրել են Գազայի հատվածում հրադադար հաստատելու մասին վերջնական համաձայնագիրը։ Ըստ աս-Սիսիի գրասենյակի՝ գագաթնաժողովի մասնակիցները կոչ են արել իրականացնել Թրամփի՝ Գազայի հակամարտության կարգավորման ծրագրի հաջորդ փուլերը, ներառյալ կառավարման, ենթակառուցվածքների վերականգնման և քաղաքական կարգավորման հարցերը։
