Հայաստանում սնկի «անհետացած» տեսակ է հայտնաբերվել

2025 թվականի սեպտեմբեր ամսին Հայհիդրոմետ ՊՈԱԿ-ի կենսաբազմազանության խմբի կողմից իրականացվող հերթական դաշտային աշխատանքների ընթացքում «Արծվաբերդ» անտառտնտեսության տարածքում գրանցվել է Battarrea phalloides սնկի տեսակը։

Այն ընդգրկված է ՀՀ կարմիր գրքում որպես Անհետացած (EX — Extinct) տեսակ։ Մինչ այս հաշվառումը՝ Հայաստանում հայտնաբերվել էր միայն 1915 թվականին Լոռու ֆլորիստական շրջանում՝ Ախթալայի շրջակայքում, սակայն նրա հերբարիումային նյութը չի պահպանվել։

Տեսակը նմուշառվել է հետագա հետազոտությունների համար:

Տարածքում առկա էր 5 առանձնյակ:

Ըստ հնէաբանական տվյալների՝ Battarrea phalloides սնկի տեսակը հանդիսանում է կավե դարաշրջանի ռելիկտ, որի վտանգման հիմնական պատճառը համապատասխան բիոտոպերի վերացումն է։