Աֆղանստանի երկրաշարժի զոհերի թիվը գերազանցել է 1400-ը, աղետի հետևանքով վիրավորվել է առնվազն 3251 մարդ, 8000 տուն ավերվել է։ Նոր տվյալները հրապարակել են տեղական իշխանությունները։ Ավելի վաղ Աֆղանստանի Կարմիր մահիկի ընկերությունը հայտնել էր 1100 զոհի մասին և զգուշացրել, որ զոհերի թիվը կարող է աճել։
Փրկարարական խմբերը շարունակում են փնտրել ողջ մնացածներին։ BBC-ի թղթակիցները հաղորդում են, որ շատ տեղացիներ գիշերը անցկացրել են դրսում։
Մահացածների մեծ մասը լեռնային Կունար նահանգի բնակիչներ էին, որը ամենամոտն է կիրակի երեկոյան տեղի ունեցած երկրաշարժի էպիկենտրոնին։
Արևմտյան երկրները երկրաշարժից հետո խոստացել են օգնել։
Մեծ Բրիտանիան խոստացել է 1 միլիոն ֆունտ ստեռլինգ, իսկ երկրի Արտաքին գործերի նախարարությունը շեշտել է, որ գումարը կտրամադրվի գործընկերների միջոցով, որ օգնությունը չհայտնվի Աֆղանստանը կառավարող «Թալիբան» շարժման ձեռքում։
Չինաստանը, Հնդկաստանը և Շվեյցարիան նույնպես խոստացել են մարդասիրական օգնություն։
Հնդկաստանի արտաքին գործերի նախարար Սուբրամանյամ Ջայշանկարը հայտարարել է, որ իր երկիրը 1000 վրան է հասցրել Քաբուլ և 15 տոննա սնունդ է տեղափոխել Կունար։
ՄԱԿ-ը խոստացել է 5 միլիոն դոլար Արտակարգ իրավիճակների արձագանքման իր հիմնադրամի միջոցով։
2021 թվականին «Թալիբան»-ի իշխանության գալուց ի վեր Աֆղանստանին տրամադրվող արտաքին օգնությունը կտրուկ կրճատվել է։
ՄԱԿ-ի զարգացման ծրագրի տվյալներով՝ Աֆղանստանի բնակչության մոտ 85%-ը ապրում է օրական մեկ դոլարից պակաս գումարով։
