Հաշվի առնելով, որ Ադրբեջանում փակվել է Կարմիր խաչի ծառայությունը, ու այնտեղ պահվող հայ գերիներին տեսակցելու հնարավորությունն այլևս բացառվում է, «Ռադիոլուրը» Հայաստանի արտաքին գտործերի նախարարությունից հետաքրքրվել էր, արդյոք ՀՀ–ն որպես միջազգային իրավունքի գործիք դիտարկո՞ւմ է դիմել որևէ երրորդ երկրի, որը կարող է ստանձնել հայ գերիներին Ադրբեջանում «հյուպատոսական այցելություններ» կազմակերպելու պատասխանատվությունը, և արդյոք Հայաստանը պաշտոնապես ստացե՞լ է «հյուպատոսական այցելություններ» կազմակերպելու առաջարկ։
Ի պատասխան հարցման՝ ԱԳՆ-ից հայտնել են, որ Ադրբեջանում գտնվող հայ ռազմագերիների և պահվող քաղաքացիական անձանց հայրենադարձման խնդիրը շարունակում է մնալ ՀՀ ուշադրության կենտրոնում։
Մեջբերում․ «Հարցին վերջերս հրապարակային անդրադարձ եղել է ամենաբարձր մակարդակով՝ ՀՀ վարչապետի կողմից, ով ընդգծել է, որ չկա որևէ բանակցություն, որի ընթացքում խնդրին չի հատկացվում պատշաճ, անհրաժեշտ ուշադրություն: ՀՀ ներկայացուցիչները տարբեր ձևաչափերի հանդիպումներում բարձրացնում են խնդիրը և փնտրում լուծումներ»․ մեջբերման ավարտը։
«Ռադիոլուրը» հետաքրքրվել էր նաև՝ արդյոք պաշտոնական Երևանը պաշտոնական Բաքվի հետ քննարկե՞լ է հայ գերիներին երրորդ երկրի հանձնելու հարցը։
Ըստ ԱԳՆ պատասխանի՝ նույն կերպ պահվող անձանց ազատ արձակման հարցը շարունակում է մնալ ՀՀ ԱԳ նախարարության առաջնային օրակարգում՝ «առաջին հերթին ադրբեջանական կողմի հետ շփումներում՝ ակնկալելով դրական հանգուցալուծում, այդ թվում նաև՝ որպես կողմերի միջև վստահության ամրապնդմանն ուղղված կարևոր քայլ»։
«Թեման և հնարավոր լուծումները պարբերաբար քննարկվում են նաև միջազգային գործընկերների հետ շփումների ընթացքում թե՛ երկկողմ, թե՛ բազմակողմ հարթակներում, այդ թվում՝ Կարմիր Խաչի կոմիտեի ներկայացուցիչների հետ քննարկումներում»,-ասված է ԱԳՆ պատասխանում։
