Իրանի մայրաքաղաք Թեհրանում գտնվող Էվին բանտի վրա հունիսի 23-ին Իսրայելի կողմից կատարված հարձակման հետևանքով զոհվել է 71 մարդ, կիրակի օրը հայտարարել է Իրանի դատական համակարգի խոսնակ Ասղար Ջահանգիրը։
Ինչպես հայտնում է Reuters-ը, Իրանի հետ օդային պատերազմի ավարտին Իսրայելը հարվածել է Թեհրանի քաղբանտարկյալների համար նախատեսված ամենահայտնի բանտին՝ ցույց տալով, որ ռազմական և միջուկային օբյեկտներից բացի թիրախավորում է Իրանի իշխող համակարգի խորհրդանիշները։
«Էվին բանտի վրա կատարված հարձակման ժամանակ նահատակվել է 71 մարդ, այդ թվում՝ վարչական աշխատակիցներ, զինվորական ծառայություն անցնող երիտասարդներ, կալանավորներ, նրանց այցելող կալանավորների ընտանիքի անդամներ և բանտի մոտակայքում ապրող հարևաններ», — ասել է Ջահանգիրը դատական համակարգի «Միզան» լրատվական կայանում հրապարակված իր ելույթում։
Ջահանգիրն ավելի վաղ հայտարարել էր, որ հարձակման հետևանքով վնասվել է Էվին բանտի վարչական շենքի մի մասը, և մարդիկ զոհվել և վիրավորվել են։
Դատական համակարգը հավելել է, որ մնացած կալանավորները տեղափոխվել են Թեհրանի նահանգի այլ բանտեր։
Էվին բանտում պահվում են մի շարք օտարերկրյա քաղաքացիներ, այդ թվում՝ երեք տարի կալանքի տակ գտնվող Ֆրանսիայի 2 քաղաքացի։
«Թեհրանի Էվին բանտի ուղղությամբ կատարված հարվածը վտանգի տակ է դրել մեր քաղաքացիներ Սեսիլ Կոլլերին և Ժակ Պարիին։ Սա անընդունելի է», — հարձակումից հետո սոցիալական ցանցում գրել է Ֆրանսիայի արտաքին գործերի նախարար Ժան-Նոել Բարոն։
