Սերբիայում ձերբակալվել է բռնի իշխանափոխություն ծրագրող խումբ

Սերբիայի իշխանությունները ձերբակալել են վեց հոգու երկրի սահմանադրական կարգի եւ անվտանգության դեմ գործողություններ կազմակերպելու կասկածանքով, հայտնում է BBC-ին։ Ձերբակալությունները եղել են նոր ընտրություններ անցկացնելու պահանջով հերթական բողոքի ակցիաներից առաջ։ Politico-ն գրում է, որ ձերբակալվածներից մեկը կապ ունի Ռուսաստանի Դաշնային անվտանգության ծառայության հետ։

Սերբիայի ՆԳՆ-ն պնդում է, որ հունիսի 21-ին ձերբակալվածները հավաքվել են Կրալեւո քաղաքի հյուրանոցներից մեկում` բռնի իշխանափոխություն ծրագրելու նպատակով։

Պաշտոնական հաղորդագրության համաձայն` նրանք քննարկել են նաեւ «պետական կառույցների ներկայացուցիչների վրա հարձակումը», «ոստիկանության աշխատակիցներին զինաթափելու նպատակով նրանց վրա ֆիզիկական գրոհը», ինչպես նաեւ կառավարական շենքերի եւ ԶԼՄ-ների գրավումը։

Այս տարվա մարտից Սերբիայում տեղի են ունենում նոր ընտրություններ անցկացնելու պահանջով բողոքի ակցիաներ։ Մարտին Բելգրադի փողոցներ էին դուրս եկել 100 հազարից ավելի ցուցարարներ։